Për arsye nga më banalet, por sherret mes vajzave shqiptare po shtohen çdo ditë e më shumë. Me grushte, shkulje flokësh, shkelma, janë këto disa mënyra se si vajzat tona zihen në shkollë, rrugë, parqe, lagje, teksa bashkëmoshatarët e tyre, djem e vajza bëjnë sehir.Rasti më i fundit, ku vajzat kacafyteshin me njëra-tjetrën, duke përdorur edhe fjalor banal, u regjistrua në Tiranë, ku disa vajza të një shkolle 9-vjeçare po konfliktoheshin fizikisht.
Kjo shihet si një këmbanë alarmi për shoqërinë, kryesisht prindërit dhe mësuesit, të cilët duke u bazuar në këto ngjarje mes adoleshentëve, duhet të rrisin vëmendjen ndaj edukimit të fëmijëve. Shpesh nga papjekuria, por edhe nga mungesa e edukatës që merret në fillim nga prindi pastaj nga shkolla, vajza e djem, gjenden përballë një sherri brutal që lë për të dëshiruar.
Së fundmi në redaksinë e JOQ ka mbërritur një video, ku shihet një tjetër skenë e dhunshme mes dy vajzave. Siç shihet, gocat minorene, zihen sikur të ishin në një arenë boksi në mes të një rrugice në zonën e Bathores. Qytetari shkruan për JOQ, se vajzat janë në klasë të 6 të shkollës “Ibrahim Basha” në Bathore dhe janë zënë për qejf, për të treguar kush është më e fortë nga ato. Në video shihet se dy vajzat nuk janë vetëm, pasi teksa ato po zihen, ‘shfaqja’ shihet edhe nga bashkëmoshatarët e tyre.
Mesazhi në redaksi:
Prsh joq shikoni vajzat e klasave te 6 te shkolles 9vjecare ibrahim basha ne bathore. Vidjo esht bere dje. Vajzat jan zene per qef te bejne se kush eshte me e forta. Ju lutem gjeni nje zgjidhje qe vajzat mos te zihen me. E kan hedhur ne nje instagram fallco. Dhe un i njoha gocat
Mbi ngjarjen pritet një reagim nga policia dhe shoqëria të jetë më e vetëdijshme për mënyrën se si rrisin brezat pasardhëse, pasi rastet e dhunës mes adoleshentëve janë shtuar ndjeshëm, teksa ende nuk po merren masa të duhura që në familje prindërit të edukojnë si duhet fëmijët, ndërsa në shkollë të punësohen sa më shumë psikologë që të këshillojnë këtë grupmoshë kaq të ndjeshme dhe delikate.
