Një ngjarje e rëndë e ndodhur pasditen e djeshme në fshatin Zvezdë të Maliqit ka marrë një rrjedhë krejt tjetër nga ajo që u raportua në fillim, ku dyshimet kryesore kishin të bënin me një vdekje aksidentale.
Së fundmi mësohet se është arrestuar Shefki Bylykbashi, si autori i vrasjes së djalit të tij, Hamdi Bylykbashi. Fillimisht autorët kanë bërë me dije se 50-vjeçari ka qenë i dehur dhe si pasojë ka rënë nga shkallët dhe ka pësuar dëmtime të rënda në kokë.
Por pas hetimeve të policisë, është zbuluar se 50-vjeçari është konfliktuar në banesë me babanë e tij, të cilin mësohet se ka dashur ta hedhë në pusin në oborrin para shtëpisë. Për të shmangur këtë, 77-vjeçari e ka goditur disa herë në kokë me çekiç dhe djali i tij ka mbetur i vdekur.
Raportimet e para janë se viktima Hamdi Bylykbashi së fundmi ishte ndarë nga gruaja në muajt e fundit dhe gjatë kësaj periudhe kishte nisur ta tepronte çdo ditë me alkoolin. Ai ishte emigrant në Francë dhe qe kthyer pas divorcit me bashkëshorten.
Njoftimi i Policisë: Maliq/ U raportua fillimisht si ngjarje aksidentale, por pas hetimeve të thelluara nga grupi hetimor zbardhet ngjarja e ndodhur pasditen e djeshme, në fshatin Zvezdë, ku humbi jetën 50-vjeçari H. B. Vihet në pranga babai i viktimës, autor i dyshuar i vrasjes (me sende të forta) të djalit të tij.
Shërbimet e Komisariatit të Policisë Maliq, pasditen e djeshme, pas marrjes së njoftimit se në spitalin e Korçës, ishte sjellë i pajetë shtetasi H. B., 50 vjeç, banues në fshatin Zvezdë, Maliq, menjëherë kanë shkuar në spital dhe në vendngjarje, me qëllim verifikimin e rastit.
Fillimisht familjarët e tij kanë deklaruar se 50-vjeçari, duke qenë në gjendje të dehur, ishte rrëzuar aksidentalisht në banesën e tij dhe për pasojë kishte marrë dëmtime në kokë.
Pas hetimeve të thelluara të kryera nga grupi hetimor i përbërë nga specialistët për Hetimin e Krimeve të Komisariatin e Policisë Maliq dhe specialistët e Seksionit për Hetimin e Krimeve të Rënda të DVP Korçë, nën drejtimin e Prokurorisë së Rrethit Gjyqësor Korçë, u bë e mundur zbardhja e plotë e rrethanave të kësaj ngjarjeje.
Nga hetimet e thelluara dhe provat e siguruara rezultoi se pasditen e djeshme, 50-vjeçari duke qenë në gjendje të dehur, është konfliktuar në banesë me babain Sh. B., 77 vjeç, të cilin ka dashur t’a hedhë në pusin e ujit në oborr.
Më pas 77-vjeçari, e ka goditur disa herë në kokë me mjete të forta (çekiç që përdoret për të thyer gurë), ku si pasojë e dëmtimit të rëndë, 50-vjeçari ka humbur jetën gjatë transportimit për në spitalin e Korçës.
Në vijim të veprimeve procedurale, u bë arrestimi në flagrancë i shtetasit Sh. B., 77 vjeç, për veprën penale “Vrasja për shkak të marrëdhënieve familjare”. Materialet i kaluan Prokurorisë pranë Gjykatës së Rrethit Gjyqësor Korçë, për veprime të mëtejshme.