Kosova ka vendosur të nderojë viktimat e tërmetit të ndodhur në Turqi dhe Siri. Presidentja Vjosa Osmani, duke shprehur ngushëllimin për mbi 5 mijë personat që humbën jetë nën rrënoja deri tani, ka vendosur që dita e nesërme, 8 shkurt, të shpallet ditë zie në Kosovë. Flamujt në institucionet kryesore do të ulen në gjysmë-shtizë për të paktën 24 orë.
Së fundmi Kosova nisi dhe një grup të kërkim-shpëimit drejt Turqisë për t'u ardhur në ndihmë personave të mbetur nën rrënojat e ndërtesave të shembura. Turqia ka qenë një nga shtetet që ka mbështetur më shumë Kosovën dhe shteti i dytë pas Amerikës që ka njohur Pavarësinë.
Postimi i Vjosa Osmanit:
Më shumë se 5 mijë viktima janë konfirmuar të vdekur nga tërmeti në Turqi e Siri, ndërkaq mijëra të tjerë janë akoma nën rrënoja. Një tragjedi e përmasave shkatërrimtare që ka shkaktuar trishtim e dhimbje kudo në botë, përfshirë në Kosovë. Dhimbje pafund për viktimat e për ata që përjetuan tmerrin e humbën më të dashurit por edhe shpresë për ata që ende ndodhen nën rrënoja.
Mendimet dhe lutjet tona sot, sikurse edhe dje janë për viktimat, të lënduarit dhe të gjithë të prekurit nga ky tërmet e solidarizimi ynë është i plotë. Ushtarakët tanë tashmë gjinden në Turqi ndërkaq Kosova është në dispozicion të plotë të vazhdojë mbështetjen.
Përballë tragjedive të tilla duhet të qëndrojmë pranë atyre që kanë nevojë për mbështetje. Dhimbja e popullit turk dhe atij të Sirisë është edhe e jona. Prandaj, bazuar në kompetencat kushtetuese e ligjore, në shenjë respekti shtetëror e qytetar, ditën e mërkurë, 8 shkurt 2023 e kam shpallur Ditë Zie Shtetërore në Republikën e Kosovës, pas tërmeteve të datës 6 shkurt 2023 me epiqendër në Turqi, të cilët lanë mijëra të vdekur e të lënduar.
Teksa kujtojmë viktimat, nderojmë trimërinë dhe qëndresën e atyre që po bëjnë të pamundurën për shpëtimin e çdo jete nën rrënoja.
Fuqia shkatërruese e këtij tërmeti ka tronditur zemrat e gjithsecilit, porse mbështetja ndaj njëri- tjetrit në këto ditë tmerri ngjallë shpresën dhe besimin se jeta do të triumfojë.
