“Zjarr luftarak, ky është urdhri”/ Zbardhen komunikimet e Prendit me vartësit në momentin e 4 vrasjeve të 21 janarit

Shkruar nga: Bardh Kodheli | Publikuar më: 21.01.2023, 11:30

21 janar 2023, e njëjta histori. Politikanë e ministra, që dalin para mikrofonave dhe hedhin barrën e supeve të tyre në oborret e baltosura të organeve të drejtësisë për një nga ngjarjet më të rënda të mbi 32 viteve demokraci, vrasjen e katër personave në një protestë kundër qeverisë Berisha në 21 janar 2011.

Premtime e deklarata të forta, por asgjë e materializuar pas 12 vitesh nga vrasja e Ziver Veizit, Hekuran Dedës, Aleks Nikës dhe Faik Myrtajt. Të gjithë të përfshirët në vrasjen e këtyre katër personave të pafajshëm, të cilët nuk cenonin jetën e askujt, janë të lirë, një pjesë e të tyre duke notuar mes parave.

Shumë vonë, por vetëm së fundmi ka mundur të filtrojë zbardhja e audios së komunikimeve në radio të komandantit të atëhershëm të Gardës së Republikës, Ndrea Prendit dhe vartësve të tij. Në këto zbardhje të publikuara në “Xhungël.al” nga gazetari Artan Hoxha, shihet qartë se urdhrin e vrasjes së katër personave e jep vetë Ndrea Prendi.

Të paktën ai është personi i fundit që transmeton direktivën për të hapur zjarr luftarak, teksa bie në sy fakti që urdhrin nuk e jep në vetën e parë, por shprehet: “Ky është urdhri”. Ndërkohë, në një moment në radio ndërhyn edhe Ministri i Brendshëm i asaj kohe, Lulzim Basha, fjalët e të cilit nuk zbardhen.

Gjithashtu, i çuditshëm është fakti që urdhri për të hapur zjarr jepet në momentin kur protestuesit çajnë rrethimin e kryeministrisë, por asnjë prej të vrarëve nuk mbeti i vrarë në brendësi të rrethimit të institucionit. Ky zbulim deri më tani ka vërtetuar dy gjëra.

Ka hedhur poshtë teorinë e çmendur të stilolapsave dhe çadrave pistoletë dhe ka vërtetuar tërësisht se katër vrasjet në mes të bulevardit janë kryer nga shteti. Gjithsesi, jo bindëse është se Ndrea Prendi kishte këllqe të urdhëronte vetë vrasjen e katër personave, pa një urdhër nga lart.

Gjithashtu i paqartë është shkaku përse u qëllua ndaj personave, që në atë moment ishin shumë të qetë dhe nuk po bënin asgjë tjetër, veçse po qëndronin dhe soditnin situatën. Pas gjithë atyre të shtënave qitësit kanë marrë shenjë direkt te objektivi dhe nuk kanë tentuar neutralizimin e turmës.

KOMUNIKIMI I PARË:

Ndrea Prendi: Alfred dëgjon?

Alfred Ahmetcenaj: Po dëgjoj

Ndrea Prendi: Po afrohen shumë, duhet të jeni gati për zjarr

Alfred Ahmetcenaj: Po të kuptova drejt.

KOMUNIKIMI I DYTË:

Komandanti i Gardës, Ndrea Prendi: Të mbahen armët në dorë gati për zjarr. Të mbahen armët në dorë gati për zjarr në ajër. Pastaj kur të them unë në trup.

Ndrea Prendi: Artan (Artan Hoxha, zv komandanti i Gardës). Dëgjon? Artan dëgjon?

Artan Hoxha: Dëgjoj, dëgjoj.

KOMUNIKIMI I TRETË:

Ndrea Prendi: Me të kaluar gardhi i telave do hapet zjarr luftarak.

Artan Hoxha: Kuptova, kuptova.

Ndrea Prendi: Ky është urdhri, Dashamir dëgjuat?

Dy efektiva të njësisë speciale: Alfred (Alfred Ahmetcenaj) ta-ta-ta gjakos (urdhëri për të vrarë)

Komunikimet (urdhërat) janë dhënë vetëm me radio nga komandanti i Gardës për vartësit e tij. Pasi u dha urdhëri për të qëlluar, u zbatua duke realizuar të shtënat një nga një dhe me breshëri, nuk është dhënë me asnjë urdhër tjetër për të qëlluar. Nga komunikimi në radio, menjëherë pas vrasjeve të protestuesëve, ka jnë qetësi absolute tek komandanti i Gardës dhe oficerët drejtues me të cilët ai komunikon. Komunikimi në vijim është sikur nuk ka ndodhur asgjë, madje nuk përmendet në asnjë moment që ka të vrasë apo të plagosur.

I panjohur: 260 i Luanit, dëgjon?

260 i Luanit: Ju dëgjoj

I panjohur: Të kërkon ministri, këtu në radio

KOMUNIKIMI I KATËRT:

Audio: Menjëherë dëgjohen të shtëna tek e tek, sërish dëgjohen 8 të shtëna radhazi një nga një.

Ndrea Prendi: Alfred?

Alfred Ahmetcenaj: Po dëgjoj (dëgjohen 2-3 të shtëna tek e tek)

Ndrea Prendi: Kujdes municionin! Kujdes municionin!

KOMUNIKIMI I PESTË:

Ndrea Prendi: Martin më dëgjon? Agim më dëgjon? Agim? Agim? 202 i Tufanit (kodi i radios) më dëgjon?

202 i Tufanit: Këtu jam. Ngjitur, ngjitur.

Ndrea Prendi: Alfred, një grup i njësisë speciale këtu tek porta numër 2.

Alfred Ahmetcenaj: Të kuptova.

Ndrea Prendi: Artan më dëgjon?

Artan Hoxha: Dëgjoj.

Ndrea Prendi: Le ta djegin pemën, nuk ka problem.

I panjohur: 260 e Luanit?

I panjohur: Luani 3.

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
Më të Lexuarat
Shkarkoni aplikacionin JOQ ALBANIA në platformat
Më të fundit