Bordi vijon me zhvatjen masive, çmimi i naftës duhet të ishte 33 lekë më pak seç u vendos dje

Shkruar nga: Bardh Kodheli | Publikuar më: 18.01.2023, 11:43

Bordi i Transparencës u zgjua ditën e djeshme dhe nuk na surprizoi aspak, pasi vendosi të rriste çmimin e naftës me 9 lekë, duke e çuar në 208 lekë për litër. Mbledhja e fundit e këtij Bordi ishte kryer më 20 dhjetor të vitit të shkuar.

Çmimi i naftës në bursë është rreth 85 dollarë për fuçi, në nivelet më të ulëta që nga tetori i vitit 2021. Në kohën kur çmimi i naftës në bursë kishte këtë çmim, shqiptarët e blinin me 174.5 lekë, ndërsa sot e blejnë me 33 lekë më shumë, pra 16% më shtrenjtë.

Që prej muajit mars të vitit të shkuar çmimet tavan të naftës vendosen nga ky bord, por deri më tani mund të themi se ka dështuar tërësisht, pasi çmimet e vendosura janë më të lartat në rajon dhe reagimet e tyre janë shumë të vona kur ka ulje dhe të menjëhershme kur ka rritje të çmimit.

Bizneset që operojnë në këtë veprimtari kanë pohuar vazhdimisht se Bordi i ngritur nga qeveria, me ndërhyrjet e tij të shpeshta dhe të paparashikueshme, po i mban çmimet të larta në mënyrë artificiale. Sipas Shoqatës së Hidrokarbureve, nëse operatorët do të ishin të lirë të vendosnin për çmimet, secili prej tyre do të bënte blerje më afatgjata.

Ministrja e Infrastrukturës dhe Energjisë, Belinda Balluku, tha në fillim të këtij viti se Bordi pritet që të shkrihej së shpejti, ndërkohë që dje u vendos të ndërhyhej sërish tek çmimet. Mbajtja lart e çmimit ka dërguar në arkat e shtetit plot 135 milionë euro më shumë TVSH, pra shtetit i leverdis që bordi të vijojë punën.

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
Më të Lexuarat
Shkarkoni aplikacionin JOQ ALBANIA në platformat
Më të fundit