Pavarësisht se Andrew Tate dhe vëllai i tij po hetohen për akuza për trafikim njerëzor dhe përdhunim, kjo nuk i ka ndaluar mbështetësit e tij në Greqi të organizojnë një protestë për të në kryeqytet.
Dhjetra të rinj marshuan nëpër rrugën Ermou, bulevardin kryesor të këmbësorëve në Athinë, duke brohoritur "Lironi Top G", një referencë për Andrew Tate.
Ndërkohë, autoritetet rumune thanë se kanë sekuestruar rreth 4 milionë dollarë pasuri që i përkasin personalitetit kontravers në internet. Ndër 29 pasuritë e sekuestruara janë automjete, ora luksoze dhe shuma parash në disa monedha të ndryshme.
Konfiskimet janë kryer me urdhër të prokurorëve të Drejtorisë për Hetimin e Krimit të Organizuar dhe Terrorizmit.
Videoja e publikuar nga Reuters tregon autoritetet rumune në një kompleks të zbukuruar me një simbol të madh "Tate" duke sekuestruar disa automjete me vlerë të lartë, duke përfshirë një Rolls Royce, një BMW dhe një Mercedes Benz.
Andrew dhe vëllai i tij Tristan Tate u arrestuan në Rumani në dhjetor teksa prokurorët ndoqën pretendimet për trafikim njerëzor dhe përdhunim.
Autoritetet në Rumani thanë se policia dha urdhër kontrolli në pesë shtëpi dhe mori në paraburgim katër të dyshuar dy britanikë dhe dy rumunë si pjesë e hetimit.
Drejtoria e Rumanisë për Hetimin e Krimit të Organizuar dhe Terrorizmit (DIICOT) tha se katër të dyshuarit ishin ndaluar për 24 orët e para.
Një gjykatë në Bukuresht pranoi një kërkesë nga DIICOT për të mbajtur Tate dhe vëllain e tij Tristan në paraburgim për 30 ditë të tjera, deklaroi avokati i tyre Eugen Vidineac më 30 dhjetor.
DIICOT pretendoi se katër të dyshuarit formuan një grup të organizuar kriminal që shtrihej nga Rumania në Britani dhe Shtetet e Bashkuara, me qëllim kryerjen e krimit të trafikimit të qenieve njerëzore.
Autoritetet pretendojnë se dy nga të dyshuarit i mashtruan viktimat "duke besuar se synonin të hynin në një marrëdhënie martese/bashkëjetese" gjatë transportimit të viktimave në Rumani dhe më vonë duke i shfrytëzuar seksualisht me dhunë fizike.
Autoritetet thanë gjithashtu se një nga të dyshuarit përdhunoi një viktimë në dy raste në mars të 2022. Të paktën gjashtë viktima dyshohet se janë "shfrytëzuar seksualisht nga grupi i organizuar kriminal", thuhet në deklaratën e DIICOT.
