Një shofer i dehur, që drejtonte makinën në mënyrë të çrregullt, ka përplasur një këmbësor në Korçë. A.D, 66-vjeç, banues në Maliq, është arrestuar nga policia, ndërkohë që i aksidentuari, R.Z., 58-vjeç, ndodhet në spitalin e Korçës ku po merr shërbimin e nevojshëm mjekësor.
Njoftimi i Policisë: Specialistët e Trafikut Urban dhe Interurban të DVP Korçë arrestuan në flagrancë shtetasin AD., 66 vjeç, banues në Maliq, për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”.
Ky shtetas, në aksin rrugor Korçë-Pogradec, pranë kryqëzimit të fshatit Libonik, duke drejtuar automjetin tip “Benz”, ka aksidentuar shtetasin R. Z., 58 vjeç, banues në Libonik, Maliq, që lëvizte me biçikletë, i cili ndodhet në spitalin e Korçës, jashtë rrezikut për jetën. Nga kryerja e testit të alkoolit, shtetasi A. D. rezultoi në gjendje të dehur.
