Mbështetësit e ish-presidentit brazilian Jair Bolsonaro, të cilët refuzojnë të pranojnë humbjen e tij në zgjedhje, sulmuan Kongresin, Gjykatën e Lartë dhe pallatin presidencial ditën e djeshme, një javë pas inaugurimit të rivalit të tij të majtë, presidentit Luiz Inácio Lula da Silva, raporton CBS news.
Mijëra demonstrues anashkaluan barrikadat e sigurisë, u ngjitën në çati, thyen xhamat dhe pushtuan të tre ndërtesat, të cilat besohet se ishin kryesisht të boshatisura në fundjavë. Disa nga demonstruesit kërkuan një ndërhyrje ushtarake ose për të rikthyer në pushtet Bolsonaro-n e ekstremit të djathtë ose për të rrëzuar Lulën nga presidenca.
Kaluan orë të tëra para se të rivendosej kontrolli i ndërtesave në sheshin e gjerë Tre Fuqitë e Brasilias, me qindra pjesëmarrës të arrestuar. Në një konferencë shtypi nga shteti i Sao Paulos, Lula akuzoi Bolsonaron për inkurajimin e kryengritjes nga ata që ai i quajti "fashistë fanatikë", dhe lexoi një dekret të sapo nënshkruar që qeveria federale të marrë kontrollin e sigurisë në distriktin federal.
“Nuk ka asnjë precedent për atë që kanë bërë dhe këta persona duhet të ndëshkohen”, tha Lula.
Kanali televiziv Globo News tregoi protestuesit që enden në pallatin presidencial, të veshur me ngjyrat jeshile dhe të verdhë të flamurit kombëtar që gjithashtu kanë ardhur për të simbolizuar lëvizjen konservatore të kombit, të përfaqësuar nga Bolsonaro.
Ish-presidenti është përplasur vazhdimisht me gjyqtarët e Gjykatës së Lartë dhe dhoma ku ata mblidhen u shkatërrua nga rebelët. Ata plaçkitën zyrat në pallatin presidencial. Dritaret u thyen në të gjitha ndërtesat.
Bolsonaro, i cili u largua në Florida përpara inaugurimit të Lulës, hodhi poshtë akuzat e presidentit të dielën vonë. Ai shkroi në Twitter se protesta paqësore është pjesë e demokracisë, por vandalizmi dhe pushtimi i ndërtesave publike janë "përjashtim nga rregulli".
Policia hodhi gaz lotsjellës në përpjekjet e saj për të rimarrë ndërtesat dhe u shfaq në televizion në orët e vona të pasdites. Me rivendosjen e kontrollit të ndërtesave nga autoritetet, Ministri i Drejtësisë Flavio Dino tha në një konferencë shtypi se rreth 200 njerëz ishin arrestuar dhe oficerët po hidhnin më shumë gaz lotsjellës për të larguar protestuesit e mbetur.
Por me dëmin e bërë tashmë, në Brazil hodhën pyetje se si policia kishte injoruar paralajmërimet e shumta, ishte e papërgatitur ose ishte disi bashkëpunëtore.
