Pak ditë më parë, në një lokal në Prizren u vra 31-vjeçari kuksian Visart Cengu. Ai dhe dy shokët e tij, Rufgen Shehu dhe Arben Basha sapo kishin dalë nga lokali ku kishin ngrënë darkë kur u sulmuan me armë nga pronari Dibran Hoxhaj, i njohur ndryshe si "King Kobra".
Kuksiani Visart Cengu ishte kthyer nga Franca për festat e fundvitit dhe pas festimit me familjen kishte shkuar në Prizren me dy shokët, fqinj të tij. Xhaxhai i 31-vjeçarit të vrarë, Besim Cengu ka deklaruar për mediat se nipi i tij nuk ka qenë i armatosur në momentin që "King Kobra" e ka sulmuar.
Ai thotë se nëse autori i ngjarjes nuk merr dënimin e merituar, ata do të reagojnë pasi nuk beson që vrasja të ketë ndodhur për mospagimin e faturës. Më tej ai shton se "King Kobra" ka më shumë se 35 precedentë penalë dhe duhet të marrë dënimin e merituar.
Përse shkoi nipi me dy shokët në Prizren?
Nipi ka qenë emigrant. Është kthyer nga Franca para një muaji. Është djali i vetëm. Pas festës në shtëpi me prindërit dhe tre motrat iku në Prizren me dy shokë moshatarë, që i ka edhe fqinj. Shkuan të konsumonin një darkë meqë ishin ditët e pushimit.
A mendoni se qëndron versioni që konflikti ka nisur për faturën?
Kjo është një version i atij djalit atje për të dalë nga situata. Është version i atyre. Këta kanë shkuar kanë ngrënë darkë dhe nuk kanë paguar faturën? Kjo është skandaloze. Nuk ndodh. Por ka një problem, personi që ka kryer krimin, është me më shumë se 35 precedentë.
A mendoni se do të ketë drejtësi apo autori do të dalë nga burgu sikur ka ndodhur më parë?
Fëmijët tanë nuk ishin të armatosur. Ai ka pasur truproja. Kur ke “mashën pse djeg duart”? Unë e njoh atë vend komplet. Të gjitha lokalet në periferi të Prizrenit janë të infektuara, ose janë lokale nate, shfrytëzohen prostituta dhe e dyta aty është edhe elementi i krimit, armës. Këta (djemtë) nuk e kanë ditur këtë formë, kanë shkuar për një darkë dhe ngecën në atë vend.
Çfarë ndodh nëse autori del nga burgu?
Unë e njoh shumë mirë situatën aty. Ne jemi në një periudhë ku duhet të zgjojmë ndërgjegjen tonë, jo vetëm qytetare por edhe qeverisje së dy krahëve, që duke lënë këta njerëz jashtë, këta me siguri do të ndikohen negativisht tek krahu tjetër. Nëse do ta nxjerrës vrasësin e djalit me siguri do të nxitet krahu tjetër. Kur merret masa amortizohet situata. Ky nuk është kërcënim. Duhet drejtësi.
Kurrë më figura të kësaj natyre. Janë mbeturina orientale. Personi ka mbi 10 vite ecën edhe i veshur si oriental, po përdhos edhe mentalitetin religjioz, futet në xhami dhe falet, na jep mend ne. Kjo është e tmerrshme. Ky është personi, që ka menaxhuar një femër me një emër arme (Kallashi). Nëse ai del nga burgu, do të zgjojë tek ne reagimin me siguri. Nuk janë larg. Janë shumë afër. Prej fshatit ku është ky djali, autori unë jam stërnip.
Nëse nga pala tjetër do të kishte iniciativë, do t’i prisnit për ta dëgjuar?
Nuk e besoj. Nëse gjykoj këtë veprimin e fundit të atij djalit, nëse e gjykojmë se ka ardhur si rezultat i një kulture edukimi nga ajo familje, është shumë e vështirë me pasur burra prej atyre me ardhur me diskutuar. Ne nuk jemi familje patriarkale. Ne edhe tolerojmë edhe gjykohet, edhe di të flasë dhe gjykojë. Ne nuk do të fillojmë luftën.
Ne jemi një komb, popull dhe mentalitet, ky është rast i veçuar. Nuk mund të na komandojnë këta njerëz. Këta kokëqethur, me zinxhir sa një gisht në qafë. Mjaft më me këta njerëz. Nuk mund ta ngrenë zvarrë popullin si ky ordiner. I mbylli derën vëllait. I kanë mbetur tre motra, prindi dhe nëna e vet krahëthatë. Si mundet që të dalë prapë ky njeri dhe të qarkullojë prapë, kjo do të ishte skandaloze. Dobësia më e madhe e shtetit në Kosovë.
