Vetëm një ditë pasi ish-drejtoresha e Mjedisit në bashkinë e Tiranës, Viola Sterjo, u arrestua për mashtrim me dhjetëra mijëra euro kundrejt disa bizneseve, një tjetër punonjëse e shtetit ka rënë në prangat e policisë për një vepër të rëndë penale.
Erisa Fero, 28 vjeç, e cila punonte si shefe kompjuterike në Agjencinë Kombëtare të Shoqërisë së Informacionit (AKSHI), transportonte me makinën e saj personale plot 58 kilogramë kanabis, e ndihmuar edhe nga tre persona të tjerë, një i arrestuar dhe dy të shpallur në kërkim.
Hetimet kanë zbuluar gjithashtu se dy efektivë të policisë rrugore kanë asistuar që droga të transportohej pa u pikasur nga policia. Ndaj tyre është lëshuar akuza për shpërdorim detyre, teksa ende nuk janë zbuluar emrat. Droga ishte nisur në Tiranë dhe kishte destinacion final Maqedoninë e Veriut.
