Gjykata e Apelit ka lënë në burg 31-vjeçarin Gert Shehu, i cili goditi Sali Berishën në protestën e Opozitës. Seanca e sotme u zhvillua pas kërkesës së avokatëve të 31-vjeçarit për ndryshimin e masës me arsyetimin se ka nevojë për shtrim në spital psiakitrik.
Edhe gjatë seancës gjyqësore, Gert Shehu u ka kërkuar gjyqtarëve që ta lënë të lirë pasi i duhet të kthehet në shtëpi se është djalë i vetëm dhe duhet të pijë ilaçet.
Pavarësisht pretendimeve dhe kërkesave, gjykata la të pandryshuar masën e sigurisë "arrest me burg" për 31-vjeçarin.
Kujtojmë se Gert Shehu goditi Sali Berishën me grusht më 6 dhjetor në protestën që opozita po zhvillonte në bulevardin “Dëshmorët e Kombit”. Si pasojë, Berisha mbeti i gjakosur në pjesën e hundës dhe poshtë syrit. Shehu më pas u neutralizua dhe u dhunua nga truprojat e Berishës dhe protestuesit, para se të dorëzohej në polici.
