Ish-drejtoresha e Mjedisit në Bashkinë e Tiranës, Viola Sterjo është arrestuar nën akuzën për mashtrim. Sipas policisë, dyshohet se 39-vjeçarja ka mashtruar disa persona në qytetin e Korçës duke i marrë para në këmbim të ndikimit në autoritetet shtetërore për marrjen e fondeve shtetërore në favor të këtyre shtetasve.
Gjithsesi, gjithçka është zbuluar tashmë dhe ajo duhet të përballet me organet e drejtësisë. Ngjarja ka ndodhur në periudhën mars-nëntor 2020, kur dyshohet se ajo ka përfituar shuma të konsiderueshme parash.
NJOFTIMI I POLICISË – Specialistët për Hetimin e Krimit Ekonomik-Financiar në DVP Korçë, në bashkëpunim me specialistët e Seksionit të Kërkimit në DVP Tiranë, bënë ekzekutimin e urdhrit të Prokurorisë për ndalimin e shtetases V. S., 39 vjeçe, banuese në Tiranë.
Ndalimi i saj u bë pasi, Gjykata e Shkallës së Parë Korçë, me vendimin e datës 26.12.2022, ka caktuar për këtë shtetase masën e sigurisë “Arrest në burg”, për veprën penale “Mashtrimi”, me pasoja të rënda.
Nga hetimet e kryera rezulton se në periudhën mars-nëntor 2020, nëpërmjet mashtrimit, V. S., dyshohet se ka përfituar në qytetin e Korçës, një shumë të konsiderueshme monetare, me qëllim ndikimin e saj në institucione shtetërore, që qytetarë të ndryshëm të përfitonin fonde monetare nga shteti.
