Kryeministri i Kosovës, Albin Kurti ka folur për përpjekjet e Qeverisë së Kosovës për heqjen e 11 barrikadave në veri, të cilat kanë pamundësuar lirinë e lëvizjes. Ai ka thënë se barrikadat do të hiqen brenda disa ditëve.
Kurti ka thënë se nëse KFOR-i nuk i heq barrikadat, veprimin do ta kryejë Policia e Kosovës. “Nëse këtë nuk e bënë KFOR-i, do ta bëjmë ne. S’mund të zgjasin për muaj. As për javë, por vetëm disa ditë”, ka thënë Kurti.
Kurti ka thënë se barrikadat janë episodi i dytë në veri, që vjen si urdhër nga Beogradi. “Ne kemi policinë tonë në veri, e cila tani është më e pranishme se më parë. Por ne kemi edhe njëmbëdhjetë barrikada. Këto barrikada ishin episodi i dytë i episodit të parë, që ishte se serbët nga veriu morën urdhër nga Beogradi që të largohen nga të gjitha institucionet e Kosovës”, ka thënë ai. Duke folur për barrikadat, Kurti ka thënë se po përsëriten gabimet e viteve të ’90-a.
“Ata nuk janë krijues. Ata nuk dinë gjë tjetër veçse të përsërisin gabimet e viteve nëntëdhjetë kur ndërtuan barrikada në Bosnje dhe Kroaci. Pra, në një farë mënyre dinë vetëm të përsëriten. Unë mendoj se ata do të dështojnë”, ka thënë Kurti në një intervistë për mediumin boshnjak istraga.ba, Kurti ka deklaruar për mediumin se vendosësve të barrikadave direktivat politike edhe financat u vijnë nga Serbia.
Kryeminsitri Kurti ka thënë se popullata serbe në veri është e frikësuar nga strukturat ilegale, që janë bërë banda kriminale.
Ai ka thënë se tani, kur s’kanë arsye, po bëhen më agresive se kurrë më parë. Kryeministri i ka përshkruar edhe tiparet e tjera fizike të barrikaduesve, që i bëjnë ata t’i ngjajnë edhe më shumë Mihailoviqit.
“Këto janë barrikada të njerëzve me uniforma të errëta, njerëz që janë tullac, me mjekër, duke imituar Drazha Mihailoviqin”, ka thënë ai.
