Ashtu siç u njoftua edhe më herët, forcat e policisë RENEA dhe FNSH kanë zbarkuar sot në Fushë-Kuqe, Kurbin për kontrolle në banesën e Ervis Martinajt.
Por përveç kontrolleve në vilën e tij, policia po kryen kontrolle edhe në banesat dhe tokat e familjarëve dhe të afërmve të tij në zonë. Përmes kontrolleve në këto banesa, autoritetet synojnë gjetjen e provave që mund të çojnë drejt zbulimit të fatit të biznesmenit të lojërave të fatit i cili rezulton i zhdukur që prej 9 gushtit.
Familjarët e Ervis Martinajt kanë deklaruar se më 7 gusht kanë patur komunikimin e fundit me të, por ai është parë në Durrës dhe Tiranë më 9 gusht nën shoqërinë e një vajze dhe ish-efektivit Jeton Lami. Ky i fundit është në burg me akuzën e shpërdorimit të detyrës dhe dekonspirimit të operacioneve policore.
