Mëngjesin e sotëm forcat e policisë RENEA dhe FNSH kanë zbarkuar në Fushë-Kuqe të Kurbinit për një kontroll në stëpinë e Ervis Martinajt.
Biznesmeni i lojërave të fatit rezulton i zhdukur që prej 9 gushtit të këtij viti dhe nuk dihet nëse operacioni i policisë ka lidhje me zhdukjen e tij.
Forca të shumta policie dhe furgona e makina kanë rrethuar që në orët e para, vilën e Ervis Martinajt. Në pamjet e mëposhtme mund të shihni se si "bossi" i lojërave të fatit është siguruar që vila e tij të ketë sigurinë e duhur. Qindra metra tokë janë rrethuar nga një mur tepër i lartë i shoqëruar edhe me hekura me gjemba, si në burgje.
Por sikur të mos mjaftonte kjo, për vilën e tij, Martinaj ka zgjedhur edhe kamera me rezolucion të lartë dhe portë gjigande në hyrje.
Para zhdukjes, mesa duket, Martinaj është siguruar që vila e tij të jetë e fortifikuar mirë që askush të mos i afrohet dot.
