Një aksident tragjik i ka marrë jetën një 40-vjeçari shqiptar në Itali.
Mediat bëjnë me dije se 40-vjeçari shqiptar Alban Dushi ka humbur jetën pasi makina e tij është përplasur me një trotuar, ka goditur një grua dhe më pas një pemë. Aksidenti tragjik ndodhi mbrëmjen e vonë të së martës në via Diaz në Brescia.
Ka dyshime se 40-vjeçari shqiptar po kthehej nga puna për në banesën në Viale Piave, ku jetonte prej disa javësh, kur papritur humbi kontrollin e makinës së tij "Mercedes". Sipas një rikonstruksioni fillestar, 40-vjeçari i lindur në Shqipëri, por që prej vitesh jetonte në zonën e Brescia-s, po udhëtonte me makinën e tij kur u përplas me trotuarin ku po ecnin dy vajza, njëra prej të cilave u përplas nga makina, duke pësuar lëndime të lehta. Më pas shqitari është përplasur me një pemë dhe makina e tij është shkatërruar plotësisht duke u kthyer në një grumbull metali.
Nuk dihet ende arsyeja që ka shkaktuar aksidentin, hetimet janë duke u zhvilluar por nuk përjashtohet mundësia që viktima t'i nënshtrohet autopsisë për të zbardhur shkaqet e vdekjes dhe për të vërtetuar nëse mund të ketë pasur ndonjë sëmundje në momentin që ka ndodhur aksidenti.
