Policia e Kosovës ka njoftuar se është mbyllur për qarkullim rruga drejt Jarinjes.
Në njoftim fillimisht bëhet e ditur se Policia e Kosovës e ka arrestuar të dyshuarin D.P në Pikën Kufitare të Jarinjes lidhur me përfshirjen në vepra penale terroriste si dhe sulm kundër sistemit kushtetues të vendit.
Më tej, bëhet e ditur se në veri disa persona dhe grupe të organizuara kanë bllokuar rrugët me mjetë të rënda dhe kanë pamundësuar qarkullimin e lirë.
Më tej, Policia e Kosovës ka thënë se si masë paraprake të sigurisë ka mbyllur rrugën në drejtim të Jarinjes dhe ka ftuar qytetarët të shfrytëzojnë rrugët e tjera.
Tutje, Policia e Kosovës ka ftuar qytetarët që të mos bien pre e provokimeve në këto rrethana.
Këtu keni njoftimin e plotë:
“KOMUNIKATË PËR MEDIA
Prishtinë, 10 dhjetor 2022
Si rezultat i hetimeve intensive dhe angazhimeve policore, sot në Pikën Kufitare Jarinje është ndaluar personi i dyshuar D.P. (M/S/K), njëherit ish pjesëtar i PK-së, mbi dyshimin e bazuar për përfshirje në veprat penale terroriste dhe sulm kundër rendit kushtetues.
Personi i dyshuar ka qenë i përfshirë në organizimin e sulmeve në zyrat e KKZ-së dhe sulmeve ndaj personave zyrtarë të KQZ-së dhe Policisë së Kosovës.
Me qëllim të pengimit të veprimeve policore dhe sjelljes para organeve të drejtësisë së personit të dyshuar, persona/grupe të caktuara në orët e pasdites kanë filluar të grumbullohen dhe të vendosin barrikada me automjete dhe mjete të rënda.
Bllokimi i rrugëve ka ndodhur kryesisht në disa rrugë, përfshirë edhe rrugë nacionale të komunave të Leposaviçit, Zveçanit dhe Zubin Potokut, duke cenuar dhe pamundësuar lirinë e lëvizjes së lirë të qytetarëve dhe mallrave.
Si masë paraprake të sigurisë, përderisa rrugët janë të bllokuara në drejtim të Pikës Kufitare Jarinje, Policia e Kosovës të njëjtën e ka mbyllur përkohësisht për qarkullim, andaj qytetarët të shfrytëzojnë pikat tjera kufitare për qarkullim.
Si çdo herë Policia e Kosovës, fton qytetarët që të mos bien pre e thirrjeve apo provokimeve të mundshme nga persona apo grupe kriminale, por të bashkëpunojnë me Policinë e Kosovës e cila do të vazhdojë të angazhohet për ofrim të sigurisë ndaj të gjithë qytetarëve pa dallime, sjelljen para organeve të drejtësisë së personave të dyshuar, si dhe ruajtjen e rendit Kushtetues të Republikës së Kosovës”, thuhet në komunikatën e Policisë së Kosovës.
Kujtojmë se zgjedhjet komunale në veri janë shtyrë për në prill të vitit 2023 ndërsa veriu së fundmi ka qenë cak i sulmeve me bomba ndërsa sot ka pasur edhe vendosje të barrikadave në rrugë.
