Eurodeputetja socialiste greke Eva Kaili, nënkryetare e Parlamentit Evropian është arrestuar mbrëmjen e sotme në Bruksel, si pjesë e një hetimi për dyshimet për korrupsion në Katar.
Katër arrestime të tjera janë bërë më herët në mëngjes në kryeqytetin belg për të njëjtën dosje. Kaili, shoqëruese e njërit prej këtyre katër të dyshuarve, është “arrestuar për t'u intervistuar” nga policia.
Në Athinë, Partia Socialiste Greke (Pasok) anëtare e së cilës është Kaili ka njoftuar shkarkimin e saj.
Pas zhvillimeve të fundit dhe hetimit nga autoritetet belge për korrupsionin e zyrtarëve europianë, eurodeputetja Eva Kaili largohet nga PASOK.
Në qendër të hetimit, të udhëhequr nga një gjyqtar hetues i Brukselit janë veprimet e një "vendi të Gjirit" për "ndikuar në vendimet ekonomike dhe politike të Parlamentit Evropian, duke paguar shuma të konsiderueshme parash ose duke ofruar dhurata të rëndësishme.
Për sa u përket përfituesve, këta janë personalitete që kanë "një pozicion të rëndësishëm politik dhe/ose strategjik" brenda Parlamentit Evropian. Mes katër të arrestuarve është një asistent parlamentar i atashuar i grupit socialistë dhe demokratë (S&D), shoqërues i Kailit, si dhe ish-deputeti italian Pier Antonio Panzeri, gjithashtu socialist. Dy të tjerët janë drejtor OJQ dhe drejtues sindikatash me kombësi italiane.
