Qeveria e Kosovës ka miratuar sot Projektligjin për paga në sektorin publik.
Me këtë projektligj Qeveria e Kosovës ka vendosur t’i kthejë pagat e gjyqtarëve dhe prokurorëve, sikur para rritjes që ishte bërë me vendim të Qeverisë Haradinaj në vitin 2017.
Kryeministri Kurti, ka thënë se me këtë pagat e gjyqtarëve dhe prokurorëve kthehen në lartësinë e rregullimit juridik të mëparshëm.
Me Ligjin e ri për paga, Kryetari i Gjykatës Kushtetuese do ta ketë koeficientin 17.5, ndërsa një gjyqtar i kësaj Gjykate do ta ketë koeficientin 16.4, aq sa do ta kenë ministrat dhe deputetët. Kryetari i Gjykatës Supreme do ta ketë koeficientin 17, Kryesuesi i Këshillit Gjyqësor të Kosovës, 16.5, ndërsa një gjyqtar i Supremes do ta ketë koeficientin 15.5. Kryeprokurori i Shtetit do ta ketë koeficientin 17, kryesuesi i Këshillit Prokurorial 16.5. Njohësi i zhvillimeve juridike, Betim Musliu, ka thënë se ky vendim është skandaloz dhe shkatërron sistemin e drejtësisë si dhe legalizon korrupsionin.
“Vendimi i fundit i Qeverise Kurti eshte vendim skandaloz qe e shkaterron sistemin e drejtesise – edhe ashtu te lodhte, eshte vendim qe e shkaterron sigurine juridike, eshte vendim qe perfundimisht e legalizon korrupsionin ne sistemin e drejtesise. Eh tash kredite e nje pjese te gjykatesve dhe prokurorve paramendone qysh kane mu pagu?! Tmerr!”, ka shkruar ai në Facebook.
Ndërkaq Ehat Miftaraj nga KDI ka thënë se vendimi i Qeverisë për uljen e pagave për gjykatës dhe prokurorë është i kundërligjshem dhe nuk do të gjejë zbatim
“Një jurist me njohuri elementare e din se vendimi i Qeverisë per uljen e pagave për gjykatës dhe prokurorë është i kundërligjshem. Ky vendim nuk ka me gjetë zbatim. Nuk mundet mu zbatu nje vendim i kunderligjshem. Më vjen keq per Kryeministrin Kurti për nivelin e njerëzve që e keshillojne në çeshtje te drejtesise. Keta nuk ia dojne te miren Kryeministrit. Te njejtit nuk duhet me vene ne situata te tilla Kryeministrin”, ka shkruar Miftaraj.
Qeveria Haradinaj më 2017 kishte marrë vendim për rritjen e pagës të kryeministrit që automatikisht preku automatikisht edhe sistemin e drejtësisë. Qeveria Kurti 1 atë kohë kishte marrë vendim që paga e kryeministrit të zbritej, por ato të drejtësisë nuk u prekën.