Mediet britanike vijojnë të ndjekin me intensitet zhvillimet në lidhje me emigrantët, që shkojnë në Angli në mënyrë të paligjshme. “The Sun” raporton se një mënyrë e re kalimi ka nisur të aplikohet gjatë javëve të fundit.
Kjo rrugë përfshin një udhëtim prej vetëm 40 minutash me skaf nga brigjet e Belgjikës, pa rrezik për t’u kapur nga policia dhe për t’u burgosur. Çmimi për këtë shërbim ilegal të tyre është 11 mijë paund.
Trafikantët gjithashtu premtojnë ndihmë për të gjetur avokatët e duhur në mënyrë që emigrantët të shmangin kampet e qëndrimit apo kthimin e menjëhershëm në atdhe. Të tilla “paketa”, sipas “The Sun”, reklamohen në “Tik-Tok”.
ARTIKULLI: Kontrabandistët kanë nisur të ofrojnë paketa shërbimi premium për emigrantët, që duan të futen në Britaninë e Madhe duke u premtuar atyre se do të anashkalojnë qëndrimin në kampe. Trafikantët shqiptarë tani ofrojnë një paketë prej 11 mijë paundë për person, e cila përfshin një udhëtim 40 minutësh me skaf nga Belgjika, pa rrezik për t'u burgosur në mbërritje.
Ata gjithashtu premtojnë akses te avokatët , të cilët do t'i ndihmojnë ata të shmangin kampet ose dëbimin e shpejtë. Një burim në kontakt me bandat i tha The Sun: “Shqetësimi kryesor i emigrantëve tani është të mos ngecin kampet e tmerrshme duke mos qenë në gjendje të largohen. Por bandat tani po ofrojnë një shërbim premium, që e shmang atë dhe disa njerëz janë të gatshëm të paguajnë çmimin."
Trafikantët zakonisht paguajnë nga 3,500 deri në 5,000 paundë për të transportuar shqiptarët përmes Kanalit, ku oficerët e Forcave Kufitare në pritje i dërgojnë ata në kampe. Por shërbimi premium është një përgjigje ndaj alarmit pas raporteve për kushte të tmerrshme në kampet e mbipopulluara si Manston në Ramsgate, Kent.
Ata gjithashtu duan të përfitojnë financiarisht para se dimri të mbyllet dhe ta bëjë kalimin e Kanalit edhe më të rrezikshëm. Një reklamë në “Tik-Tok” thotë: “Udhëtim me skaf nga Belgjika për 40 minuta në Angli. Çmimi më i mirë nesër dhe pasnesër. Mos e vendosni jetën tuaj në rrezik në gomone. Sigurojmë kalim të sigurt, për të mos qëndruar asnjë ditë në kamp.”
Një hetues i “The Sun” i dërgoi mesazh njërës prej bandave duke i kërkuar detaje dhe iu tha: “Ti nuk shkon në një qendër paraburgimi. Një orë udhëtim. Çmimi 11 mijë paundë për person.”
I pyetur nëse njerëzit e kishin përdorur tashmë rrugën, trafikanti u përgjigj: “100% e sigurt. Të enjten dhe të premten e javës së kaluar ne dërguam njerëz.” Një tjetër reklamë e TikTok ofroi një kalim nga një vend i BE-së në MB, me pasaportë biometrike dhe një shoqërim, për 15 mijë paundë.
Tregtia fitimprurëse është bërë e lehtë pasi shqiptarët lejohen të qëndrojnë pa viza deri në 90 ditë në çdo vend të zonës Shengen, siç është Belgjika. Fluksi i emigrantëve nënkupton një rekord prej 40 mijë njerëzish, që kanë kaluar Kanalin me gomone deri më tani këtë vit. Sekretarja e Brendshme Suella Braverman e ka quajtur atë "një pushtim".