Vetëm para pak ditësh ambasadorja e BE-së dorëzoi raportin e progresit të Shqipërisë në rrugën e integrimit Europian, ku një nga pikat kritike ishte nisma e qeverisë për amnistinë fiskale, e cila sipas BE-së do t’i shërbejë krimit për të pastruar shuma të mëdha parash.
Thirrja është e qartë, nëse qeveria nuk heq dorë nga kjo nismë ligjore, do të ngadalësojë shumë procesin e integrimit, madje mund të bëjë edhe hapa pas. Gjithsesi, kryeministri Edi Rama nuk ka ndërmend të heqë dorë.
Në fjalën e tij në një nga takimet e ditës së sotme ai tha se nuk mund të kategorizohen të gjitha paratë e emigrantëve si para krimi, duke i cilësuar të papranueshme fjalët që përdoren në gjuhë të huaj kundër nesh. Edhe në këtë pikë Rama e drejtoi gishtin nga partitë opozitare.
“Kemi njerëz që janë kthyer nga emigracioni këtu. Kanë ardhur nga Tirana. Sepse kanë kuptuar që jetohet me më pak stres. Tani me kursimet e tyre nxjerrin më shumë. Për këtë po luftojmë për amnistinë fiskale. Do luftojmë deri në fund. Është e papranueshme të na tregojmë krimin dhe kriminelët si puna e atyre organeve të trafikuara.
Patjetër që shqiptarët bëjnë emër edhe në botën e krimit në botë. Janë pakicë 1%. Më pak ndërkohë që 99% janë njerëz si ata që janë këtu që kanë ardhur dhe janë martuar dhe me vajza të atyre vendeve ku kanë qenë. Mbajnë ekonominë e tyre familjare. Si qenkan këta kriminelë. Si u bëkan kursimet e tyre të tëra me një stampë tjetër prodhim i krimit.
Është e papranueshme kjo gjuhë që guxojnë të përdorin në gjuhë të huaj kundër nesh. Ata nuk kanë asnjë faj, sepse ne jemi këtu të parë. Është e djathta e rublave, ajo palo opozitë e zhdukur në thesin e rublave. Nuk është rastësi edhe për atë stampën, që mori një komb i tërë si një popull egërsirash që edhe në një luftë çlirimtare nxjerrin organet e njerëzve dhe i trafikonin.
Jam i bindur që ka gisht në një mënyrë apo një tjetër që përditë e përditë ul e ngre Shqipërinë si çerdhe krimi. Nuk ka se si shpjegohet harmonia e plotë mes partisë së atij që sot e goditur botën me luftë, të Putinit dhe atyre që sot bërtasin se Shqipëria është në rrezik. Pse ne e kundërshtuam.
Kur ia japim gojës pa asnjë siklet duke i futur të gjithë në një thes, duke trajtuar përpjekjen tonë kushtetuese për të legalizuar 30 vite gjak djersë kursime si një përpjekje të dyshimtë për të ndihmuar, lehtësuar pastruar paratë e krimit. Një skandal, e paimagjinueshme, por ne do të vazhdojmë përpara se është gjëja e duhur dhe e drejtë. Sa shqiptarë kanë shkuar në Britani me emër tjetër, si të larguar nga lufta, sepse ishin në pikë të hallit. Sa vite kanë punuar ashtu, ku do i çojnë kursimet e punës në të zezë, që e kërkojnë dhe paguajnë pronarët në këto vende, nuk i lënë ata në rrugë ne.
Do bëjmë të gjitha ato që duhet, edhe amnistinë për të cilën duhet një draft sa më i dakordësuar me miqtë tanë ndërkombëtarë, ta bëjmë për njerëzit tanë, për vendin tonë. Pastaj duhet mbështetja e nevojshme në Parlament”, deklaroi Rama.