Martina Pajollari është 18-vjeçarja e arrestuar nga policia ditën e sotme, në lidhje me vrasjen e Martin Çeços. Ajo akuzohet si bashkëpunëtore në vrasje edhe pse shumë herë i mohonte akuzat.
Policia ka arritur të sigurojë provat e mjaftueshme që vërtetojnë se kjo shtetase ka bashkëpunuar me 3 autorët e arrestuar më herët, Bledi Angjo, Valter dhe Edlir Mollaj që vuajnë dënimin në burgun e Drenovës.
Martin Çeço u vra, pasi dyshohet se i shkruante në Facebook kësaj 18-vjeçareje, që ka deklaruar në polici se kishte lidhje me Valter Mollajn, autorin kryesor të ngjarjes.
Pajollari, i mohonte akuzat në media dhe thoshte se në polici kishte deklaruar gjëra të tjera për shkak të frikës.
Njoftimi i policisë:
Vijon operacioni policor i koduar “Marjani”.
Shkon në 4 numri i të ndaluarve në lidhje me ngjarjen e ndodhur më datë 16.06.2022, në rezervuarin e fshatit Kolanec, Maliq, ku u gjet i pajetë shtetasi M. Ç.
Vihet në pranga 18-vjeçarja, e dyshuar si e implikuar në vrasjen e 26-vjeçarit.
Specialistët e Seksionit për hetimin e krimeve ndaj personit, pasurisë, të miturve dhe dhunës në familjes, në vijim të punës për zbardhjen dhe dokumentimin e plotë me prova ligjore të ngjarjes së ndodhur më datë 16.06.2022, në rezervuarin e fshatit Kolanec, Maliq, ku u gjet i pajetë shtetasi M. Ç., 26 vjeç, banues në këtë fshat, bënë ndalimin e shtetases M. P., 18 vjeçe, banuese në fshatin Marjan, Korçë.
Ndalimi i saj u bë pasi, Gjykata e Shkallës Parë Korçë me vendimin e datës 14.10.2022, ka caktuar masën e sigurisë “Arrest në burg”, për veprën penale “Vrasja me paramendim”, kryer në bashkëpunim, si e implikuar në ngjarjen e lartpërmendur, për të cilën strukturat e Drejtorisë Vendore të Policisë Korçë, kanë ndaluar më parë shtetasit B. A; V. M. dhe E. M.
Vijon puna për dokumentimim me prova ligjore të kësaj ngjarjeje.
Materialet i kaluan Prokurorisë pranë Gjykatës së Shkallës së Parë Korçë, për veprime të mëtejshme.