Garda Civile spanjolle në kuadër të operacionit EPIRO, ka shkatërruar një organizatë kriminale me origjinë shqiptare, e cila merrej me trafikimin e parregullt të emigrantëve drejt Mbretërisë së Bashkuar. Banda dërgonte me anije të miturit shqiptarë drejt Anglisë në këmbim të 3,000 deri në 15,000 eurove.
Hetimet nisën në fund të vitit 2019 kur u bë e ditur për një rrjet kriminal që merrej me futjen klandestine të emigrantëve me kombësi shqiptare në vendin britanik që nga viti 2014. Si rezultat i këtyre hetimeve, autoritetet spanjolle në bashkëpunim me ato britanike kanë arritur të arrestojnë në aeroportin e Madridit dhe në provincën e Bizkaias shtatë shtetas dhe të hetojnë një tjetër, të gjithë me kombësi shqiptare. Ata kalonin emigrantë të parregullt me origjinë shqiptare përmes trageteve dhe anijeve në Mbretërinë e Bashkuar që niseshin nga portet e Bilbaos dhe Santander.
Grupi kriminal drejtohej nga dy “shoferë”, të cilët qëndronin në Spanjë jo më shumë se tre muaj. Kur ata ktheheshin në Shqipëri reklamonin jetën e luksit që e kishin arritur nëpërmjet punës në Spanjë. Rrjeti i trafikantëve i merrte shqiptarët e mitur nga Shqipëria, i vendoste në kampet përreth objekteve portuale, duke u siguruar atyre strehim dhe ushqim dhe më pas i niste drejt Mbretërisë së Bashkuar.
Për ta bërë këtë, ata përdorën shtetas të tjerë shqiptarë me banim në provincën e Bizkaias, të cilët mbështetën bandën në detyra të ndryshme infrastrukturore. Policia spanjolle ka krye kontrolle në disa shtëpi, ku janë sekuestruar pajisje të shumta telefonike dhe kompjuterike, karta bankare apo karta të dërgesave të parave. Gjithashtu janë sekuestruar disa dokumente identiteti dhe pasaporta të nacionaliteteve të ndryshme që banda i përdorte për të penguar gjurmueshmërinë në dërgimin dhe marrjen e parave të marra.
https://www.larazon.es/espana/20221008/7rk7llhxivdbxkp2wpzp6itcpm.html
Gjithashtu ata iu mbanin dokumentet e identifikimit atyre që kalonin në Angli derisa të shlyenin tarifën me të cilën kishin rënë dakord me grupin. Arrestimi i shqiptarëve u bë në aeroport kur ata po tentonin të niseshin drejt Shqipërisë.
