Sigurimi i energjisë është kthyer në një problem të madh në mbarë Europën dhe duke shtuar këtu faktin se prodhimi i pjesës më të madhe të saj shkakton dëme të mëdha në natyrë, tregon se përpara është një punë e madhe për të bërë.
Gjithsesi, fati i mirë i Shqipërisë është vetë relievi dhe natyra e saj. Gjiganti mediatik “DW” e ka renditur vendin tonë midis listës së bekuar të shteteve që nëse investojnë në energji, mund ta sigurojnë në sasi të bollshme dhe pa e ndotur aspak mjedisin.
Sipas eksprtëve, Evropa Juglindore, ku bën pjesë edhe vendi ynë, ka potencialin të ketë pjesën më të madhe të energjisë me zero karbon të çliruar. Studimet e konfirmojnë se orët e gjata të rajonit me diell, brigjet e rrëmbyeshme dhe vargmalet malore ofrojnë kushte të jashtëzakonshme për një sektor të lulëzuar të energjisë së rinovueshme.
Përfitimet e një revolucioni të energjisë së pastër do të ishin një bonus i madh për rajonin. Meqenëse era dhe energjia diellore janë tani burimet më të lira të energjisë, shumë miliarda euro mund të kursehen nga kostot e energjisë dhe miliarda të tjera mund të grumbullohen në përfitime të tjera, si ajri më i pastër, i cili do të përmirësonte shëndetin e njerëzve.
Agjencia Ndërkombëtare e Energjisë së Rinovueshme, për shembull, vlerëson se duke shfrytëzuar energjinë diellore dhe të erës, kjo “qoshe” e Evropës ka potencialin të prodhojë 739 gigavat energji të gjelbër. Kjo është sa 739 reaktorë bërthamorë të mesëm, që prodhojnë në një vit dhe më shumë se trefishi i energjisë elektrike që Shqipëria dhe vendet e ish-Jugosllavisë konsumojnë aktualisht.
Me pak fjalë, ekziston një potencial i madh eksporti në shfrytëzimin e pasurisë energjetike natyrore të vendit tonë, që fatkeqësisht ende blen energji me çmim tepër të lartë dhe do të të rrisë akoma më shumë çmimin e saj për shkak të kostove të larta, sipas tyre.
Ky studim i ekspertëve evropianë, tregon qartë se ata që drejtojnë vendin tonë vuajnë për mend, sepse burimet i kanë. Në rast se vendi ynë do të kishte investuar me kohë për të shfrytëzuar të gjitha këto burime, atëherë nuk do të mbërrinim në pikën ku jemi sot.
Jo vetëm kaq, por do të forcoheshin ndjeshëm të ardhurat lokale, në vend të faturave të energjisë së blerë, që fryhen çdo ditë e më shumë. Pra, pse Shqipëria po importon aktualisht lëndë djegëse, fosile të shtrenjta dhe po djegin qymyrin dhe drutë e pyjeve që nxjerr nga territori i saj?
Kjo është pyetja që “DW” dhe të gjithë ne e ngremë vetëm pak ditë pasi në bregdetin tonë kanë zbarkuar dy anije, që quhen ndryshe termocentrale ujore, të cilat do të prodhojnë energji dhe do t’i kushtojnë vendit tonë qindra miliona euro. Të gjitha këto para paguhen nga financat që dalin nga xhepat tanë.
