Të fortët e babit vazhdojnë që të mos pyesin për ligjin në Shqipëri. Pas djalit të Kujtim Qefalias, që goditi punonjësit e policisë, së fundmi është djali i oligarkut Agron Papuli, ai që nuk pyet aspak për ligjin dhe kamuflohet sikur të jetë ligji vetë.
Gurten Papuli, djali i babit Agron, milionerit me taksat e shqiptarëve, në mjetin e tij luksoz “Jaguar” mban një tabelë policie, që të mos gjobitet nga efektivët e rrugores.
Siç shihet nga fotoja e mëposhtme, ai ka parkuar makinën mbi trotuar dhe për t'u treguar fodullëkun policëve, që duan të plotësojnë numrin e gjobave, ka marrë një tabelë policie dhe e ka vënë në xhamin e përparmë.
Por, çfarë është Gurteni? Është polic?
Normalisht që jo. Ai është një i fortë, që krekoset me lekët e taksapaguesve shqiptarë dhe sot thyen edhe ligjin.
Disa muaj më parë, polica ndërmorri një aksion për personat që përdorin të tilla mjete për t'i shpëtuar policisë rrugore, por mesa duket Gurtenin nuk e kanë ndaluar dot.
Se pse nuk e kanë ndaluar, e di më mirë babai i tij, që merr miliona euro nga taksat e shqiptarëve me firmën e qeverisë së Rilindjes.
