Sot bëhet 1 vit nga vrasja e Klodian Rashës, të riut që u qëllua nga një efektiv i policisë së shtetit dhe ndërroi jetë në spital. Rreth orës 01:45 të datës 8 dhjetor 2020, në rrugën "Dritan Hoxha" në Tiranë, një patrullë policie përpiqet të ndalojë një të ri 25-vjeçar, pasi po kryente veprime të dyshimta si dhe kishte shkelur Aktin Normativ për ndalimin e lëvizjes pas orës 22:00 për shkak të pandemisë së COVID-19. I riu, Klodian Rasha, nuk iu bind urdhrit të policisë për të ndaluar dhe u largua me vrap. Polcia u vu në ndjekje të tij dhe më pas në një momenti, oficeri i policisë Nevaldo Hajdaraj e qëlloi të riun me dy plumba.
Vrasja e 25 vjeçarit shkaktoi reagime të shumta në Shqipëri. Më 9 dhjetor 2020 në orët e mbrëmjes u zhvillua një protestë e dhunshme përpara godinës së Ministrisë së Brendshme dhe Kryeministrisë. Protestuesit kërkuan dorëheqjen e ministrit Sander Lleshaj, e cila erdhi disa orë më vonë, si dhe drejtësi për Klodianin. Gjatë protestës, protestuesit qëlluan godinat qeveritare me gurë dhe sende të tjera të forta.
Sot, pas një viti, përballë Ministrisë së Brendshme do të mbahen homazhe në kujtim të Klodian Rashës.
