Humb partia e Angela Merkel. Social Demokratët e Gjermanisë (SPD) kanë fituar ngushtë zgjedhjet federale të vendit, duke mposhtur partinë e kancelares në largim. SPD siguroi 25.7% të votave, ndërsa blloku konservator CDU/CSU në pushtet fitoi 24.1%. Të Gjelbrit arritën rezultatin më të mirë në historinë e partisë së tyre, duke dalë në vendin e tretë me 14.8% të votave.
Tani duhet të krijohet një koalicion për të formuar një qeveri. Kreu i SPD Olaf Scholz tha më herët se partia e tij kishte një mandat të qartë për të sunduar, pasi doli në krye. Me këtë rezultat (parapak) rritet pesha e Të Gjelbërve dhe liberalëve, roli i tyre është përcaktues në një koalicion të ri. Por vetëm muajt e ardhshëm do të tregojnë, se cilat parti do të krijojnë qeverinë e re në Gjermani. Në vitin 2017 kjo fazë zgjati gati një gjysmë viti.
