Policia ka konfirmuar para pak çastesh se nga aksidenti tragjik i ndodhur në orën 15:30 në aksin Sarandë-Gjirokastër kanë humbur jetën 4 persona (më herët u tha se ishin pesë). Mësohet se në vendin e quajtur Muzinë, mjeti tip “Land Rover” me drejtuese shtetasen R. Ç. është përplasur me mjetin tip furgon me drejtues shtetasin B. P. Nga përplasja furgoni ka dalë nga rruga duke përfunduar në një greminë rreth 25 metra poshtë duke humbur jetën 4 pasagjerët që ndodheshin në furgon.
Njoftimi i policisë:
Gjirokastër/Informacion paraprak.
Njoftohemi se rreth orës 15:30, në rugën nacionale Gjirokastër-Sarandë, në vendin e quajtur Muzinë, mjeti tip “Land Rover” me drejtuese shtetasen R. Ç. është përplasur me mjetin tip furgon me drejtues shtetasin B. P. Si pasojë e përplasjes mjeti tip furgon ka dal nga rruga dhe ka përfunduar disa metra poshtë rrugës. Për pasojë kanë humbur jetën 4 shtetas, të cilët ndodheshin në mjetin tip furgon. Në vendngjarje ndodhet grupi hetimor dhe po punon për zbardhjen e shkaqeve të aksidentit.
