Media britanike Daily Mail, ka publikuar së fundmi një artikull, ku ngre alarmin për trafikimin e emigrantëve në Angli nga shqiptarët. Në artikull shkruhet se grupe kriminale shqiptare po sponsorizojnë reklama në rrjetet social, më së shumti në Tik-Tok, ku ofrojnë kalim ilegal drejt Britanisë së Madhe me një pagesë prej 20 mijë paundësh apo edhe më shumë.
Nga një hetim i mediave britanike, rezulton që rrjetet sociale janë të mbushura me reklama nga trafikantët e qenieve njerëzore, ndonjëherë duke përqeshur përpjekje nga autoritetet britanike për t’i ndaluar ata dhe duke postuar udhëzime hap pas hapi për të ndihmuar emigrantët e paligjshëm të hyjnë në Mbretërinë e Bashkuar. Një përdorues tjetër i TikTok i quajtur England Albania publikoi një video që tregon disa shqiptarë brenda një kamioni duke thënë se ata po shkojnë në Angli.
Një tjetër llogari përmbante udhëzues se si të futesh në Britani të Madhe nga Franca, Hollanda, Belgjika, Spanja dhe Portugalia. Kujtojmë se Sekretari i Brendshëm Priti Patel, kohët e fundit vizitoi Shqipërinë për të nënshkruar një marrëveshje që përshpejton dëbimet e kriminelëve dhe azilkërkuesve. Numri i emigrantëve që kalojnë Kanalin është rritur në ditët e fundit për të shkuar në më shumë se 8,000 për një vit.