Mbi 65 persona ishin nisur drejt Kosovës me linjën e autobusëve ‘Deva Tours’ nga Frankfurti i Gjermanisë.
Por rruga e emigrantëve kosovarë këtë herë doli të jetë tragjike.
10 persona humbën jetën dhe mbi 40 të tjerë u lënduan si pasojë e aksidentit që ndodhi në afërsi të Slavonski Brod të Kroacisë.
Deri tek aksidenti thuhet të ketë ardhur nga humbja e përqendrimit të shoferit të autobusit, të cilin e kishte zënë gjumi e më pas autobusi përfundoi jashtë rrugës.
Në mesin e 10 viktimave që humbën jetën dje ishte edhe Anjeza Bellanica nga Krusha e Madhe.
18 vjeçarja vdiq duke ardhur drejt Kosovës, drejt familjarëve dhe miqve të saj. Në fillim u kërkua si e "zhdukur" por më vonë u konfirmua se ishte në mesin e të vdekurve.
Deri më tani janë konfirmuar disa nga viktimat ku 4 janë nga Komuna e Gjakovës, dy nga Rahoveci dhe një nga Komuna e Podujevës.
Shumë nga të lënduarit janë duke vazhduar marrjen e trajtimit shëndetësorë në kuadër të spitaleve rajonale në Kroaci, ndërsa ministri kroat i Shëndetësisë deklaroi dje se të njëjtit do të marrin shërbimin më të mirë të mundshëm mjekësor.