Ditën e sotme u regjistrua një aksident tragjik në autostradën “Slavonski Brod” në Kroaci, ku një autobus me targa të Kosovës doli nga rruga dhe për pasojë humbën jetën 10 persona dhe u plagosur të paktën 40 të tjerë. Ndërkohë, familjarët e një vajze e cila ishte e përfshirë në aksidentin tragjik, nuk po dinë asgjë për fatin e saj. Djali i axhës së Anjezës, Burim Bellanica, ka thënë se nuk kanë asnjë informacion në lidhje me vendndodhjen e së resë, e cila nuk po gjendet as në spital.
“Zyrtarisht nuk kemi ndonjë informacion. Vëllau është nisë prej Austrisë edhe ka mbërri aty në spital, kur ka pytë kanë thanë që nuk kemi pacient me këtë emër. Është nisë edhe daja i saj prej Kosovës, ka mbërri mirëpo nuk po e lajnë me hy mrenda. Kemi thirrë në spitalin e Zagrebit, mirëpo ajo paciente është prej Gjakovës, nuk është Anjeza.”,-ka thënë ai në RTK.
Ndërkohë, Drejtoria e Mbrojtjes Civile në Ministrinë e Mbrojtjes së Kroacisë ka publikuar një numër telefoni ku mund të merren informacione rreth pasagjerëve kosovarë që u aksidentuan këtë të diel. Zëvendëskryeministri kroat Davor Bozinoviq ka thënë se në këtë numër: 00 385 35 201 111 qytetarët mund të kontaktojnë për të marrrë informacione. Po ashtu Ministria e Punëve të Brendshme në Kosovë ka bërë të ditur se qytetarët që kanë nevojë për informata rreth situatës apo gjendjes së familjarëve të tyre të aksidentuar në Kroaci mund të kontaktojnë në numrin +383 (0) 38 200 76 000.
