Reshjet e dendura të ditëve të fundit po mbushin rrugët dhe stacionet e metrosë në Zhengzhou të Kinës. Të paktën 25 njerëz kanë humbur jetën ndërsa mijëra të tjerë kanë mbetur të bllokuar. Provinca Henan e Kinës, e cila ka një popullsi prej mbi 100 milionë banorë po përjeton përmbytjet më të mëdha në histori. Raportohet se në rajonin e përmbytur ka mungesë të theksuar ushqimesh. Gjatë tre ditëve të ardhshme parashikohen reshje shiu në të gjithë zonën Henan. Në terren ka dalë dhe Ushtria Çlirimtare e Popullit duke dërguar më shumë se 5,700 ushtarë dhe personel për të ndihmuar në kërkimin dhe shpëtimin e njerëzve.
Sipas ekspertëve, valët e nxehtësisë në SHBA dhe Kanada, përmbytjet ekstreme në Evropën Perëndimore dhe reshjet në Kinë janë të lidhura ngushtë me ngrohjen globale. Shkencëtarët shtojnë se këto fatkeqësi natyrore po vijnë për shkak të ndryshimeve klimatike dhe mesa duket kjo është kostoja që do paguajë planeti dhe njerëzimi.