Sipas të dhënave të fundit nga Instituti i Statistikave, në Shqipëri lindin më shumë djem sesa vajza, si dhe janë ata që që kur rriten emigrojnë më shumë se sa gratë. Diferencimi gjinor vihet re edhe në ciklet arsimore. Teksa në arsimin parauniversitar pjesëmarrja e djemve është më e lartë se e vajzave, ky raport përmbyset në arsimin e lartë ku pjesa më e madhe e studentëve, mbi 60% e tyre janë vajza. Sipas INSTAT, të dyja gjinitë janë diplomuar më së shumti në degët e shkencave të biznesit, administrimit dhe ligjit dhe më pas ka një diferencim të ndjeshëm gjinor në fushat ku vajzat apo djemtë kanë studiuar. Shëndeti dhe mirëqenia është preferenca e dytë e vajzave për studime, ndërsa për djemtë janë degët e inxhinierisë, prodhimit dhe ndërtimit.
Në art dhe shkenca humane ka më shumë vajza të diplomuara rreth 13%, krahasuar me djemtë që përfaqësohen nga vetëm 7% e studentëve. Sakaq arsimtarët janë më së shumti të gjinisë femërore, pasi këtë vit janë diplomuar më shumë se 12% e vajzave në këtë fushë, e vetëm 5% e djemve. Por, djemtë preferojnë të studiojnë e diplomohen kryesisht në teknologji informacioni dhe degët e bujqësisë, ndryshe nga vajzat që këto degë i rendisin në fund.
Pjesëmarrja e vajzave dhe djemve në arsim:
Në arsimin e detyrueshëm : 99,9 % djem dhe 94,2 % vajza.
Në gjimnaz: 96.8% djem dhe 90.1% vajza.