Një superskandal u bë publik disa ditë më parë në lidhje me tenderin me vlerë 2.8 miliardë lekë për uniformat e policisë. Zyrtarët e arrestuar janë të akuzuar se kanë shkelur barazinë në tenderin e zhvilluar një vit më parë për blerjen e uniformave të Policisë së Shtetit, me vlerë 280 milionë lekë të reja, ose 2.8 miliardë lekë. Tenderi u zhvillua gjatë kohës kur ministër i Brendshëm ishte Sandër Lleshi, i cili gjithashtu është nën hetim. Pas aksiont të SPAK në Ministrinë e Brendshme ku u arrestuan 11 zyrtarë, hetuesit po përpiqen që të kthejnë në bashkëpunëtorë disa nga zyrtarët e arrestuar. Burime nga Prokuroria bëjnë me dije se të paktën dy prej të arrestuarve që kanë pasur edhe rol kryesor në tenderin në fjalë, iu është ofruar statusi i bashkëpunëtorit me qëllim për të mësuar më shumë detaje në lidhje me personat e tjerë të përfshirë.
Megjithatë është e paqartë nëse këto përpjekje kanë sjellë ndonjë rezultat, ndërsa Porokuroria ka marrë nën hetim çështjen nën dyshimin se ka persona të tjerë përgjegjës në favorizimin që i është bërë kompanisë fituese. Sipas SPAK, zyrtarët kanë shkelur rregullat e prokurimit publik dhe kanë favorizuar njëri-tjetrin në kualifikimin e operatorit fitues në tenderin 2.8 miliardë lekësh.
