Këngëtarja shqiptare Rita Ora, është artistja e parë nga Kosova e cila depërtoi në tregun ndërkombëtar të muzikës.
Me debutimin e saj në vitin 2012, të gjithë ishin të apasionuar pas talentit që buronte nga një vajzë refugjate në Mbretërinë e Bashkuar.
Ajo njihet me mbiemrin Ora, por në të vërtetë mbiemri i saj origjinal është Sahatçiu.
Këngëtarja 30-vjeçare ka prejardhje nga një familje e njohur me traditë në Pejë, të cilët shquheshin si orëtarë, me çka edhe i jep kuptimim domethënies së mbiemrit të tyre “Sahaçiu (orëndërtues)”.
E duket se këtë zanat nuk e ka harruar babai i artistes nga Kosova, Besnik Sahatçiu, i cili edhe pse prej afro tri dekadash jeton në Londër, vazhdon me kënaqësi të kultivojë herë pas here këtë zanat të vjetër.
Ka qenë së fundmi bashkëshortja e Besnikut dhe nëna e këngëtares, Vera, ajo e cila ka publikuar një fotografi të burrit të saj, ku shfaqet duke rregulluar një orë jashtë përdorimit.
“Orëndërtues”, shkroi Vera në mbishkrimin e fotografisë, ndërsa etiketoi bashkëshortin e saj.
Prindërit e Rita Orës janë larguar për në Mbretërinë e Bashkuar kur Rita ishte vetëm një vjeçe, teksa talentin për t’u marrë me art, këngëtarja e ka trashëguar nga gjyshi i saj, regjisori i ndjerë me prejardhje nga Peja, Besim Sahatçiu.
