Gjykata e Posaçme ka vendosur masën “arrest me burg” për prokurorin e Sarandës, Sali Hasa i cili u arrestua disa ditë më parë me urdhër të SPAK. Kujtojmë se shkak për arrestimin e prokurorit është bërë dyshimi se ka pushuar akuzën e plagosjes për Emiljano Miranin, pasi ka marrë ryshfet nga motra e tij Elsona Papa. Ndërkohë në media janë publikuar edhe pamjet ku prokurori shfaqet në krah të motrës së Emiljan Miranit. Elsona Papa, me detyrë punonjëse e policisë bashkiake në Sarandë, shihet teksa hyn në zyrën e prokurorit e veshur me uniformën e punës. Dyshohet se ajo i ka dhënë para prokurorit Hasa, në mënyrë që të pushonte akuzën e “plagosjes së lehtë me dashje” në ngarkim të vëllait të saj, i cili ishte arrestuar.