Maqedonia e Veriut e nisi me humbje ndeshjen e parë në Euro 2020 kundrejt Austrisë. Skuadra debutuese humbi 3-1, por përveç rezultatit një episod që mori vëmendje nga mediat dhe tifozët ishte pikërisht momenti kur sulmuesi austriak Arnautoviç shpërtheu në të shara ndaj Ezgjan Alioskit pasi shënoi gol ndaj maqedonasve. "Të q**** mamanë shqiptare"– ishte kjo fraza e thënë nga Arnautoviç. Në lidhje me incidentin futbollisti shqiptar foli për Tch ku sqaroi atë që ndodhi. Alioski tha se në ndeshje të tilla është normale të ketë tension, por e rëndësishme sipas tij ishte fakti se incidenti u sqarua pas ndeshjes dhe se Arnautoviç i kishte kërkuar falje.
Alioski u shpreh:
Në ndeshje të tilla është normale që lojtarët të përjetojnë tension dhe të dalin nga kontrolli, por më e bukura është kur në fund sqarohet gjithçka dhe pajtohesh. Unë me Arnautoviç folëm pas ndeshjes dhe u sqaruam, pasi më kërkoi ndjesë dhe erdhi edhe në dhomën tonë e më dha dorën, duke u treguar shumë fair. Nuk e kam dëgjuar çfarë ka thënë, pasi po festonin tifozët, por folëm në gjermanisht pas ndeshjes dhe u pajtuam pas ndeshjes. Është diçka që ndodh, pasi në ndeshje të kapin emocionet në ndeshje, por më e mira është kur sqarohet gjithçka. Në çdo ndeshje që luaj, unë dua të bëj më mirë se takimi paraardhës. Nuk kam qenë në maksimumin tim dhe mund të bëj më mirë, por në tërësi bëmë një ndeshje të mirë. U mbajtëm mirë për 75 minuta dhe do ishte mirë të merrnim një barazim, megjithatë kemi ndeshje sërish dhe duhet të ndryshojmë menjëherë. Unë kurrë nuk e humb besimin dhe shpresoj që edhe ekipi të vijojë të besojë, pasi kjo është kryesore në një garë. Me Ukrainën duhet të shkojmë me besim për të fituar dhe jam i sigurt që mund të bëjmë mirë, siç kemi bërë edhe ndaj Gjermanisë, apo Austrisë për 75 minuta. Shpresoj marrim 3 pikë ndaj Ukrainës, që të luajmë një finale ndaj Holandës.