Një aksident i rëndë u regjistrua në orët e vona të pasdites së sotme në Tiranë, në rrugën “Xhanfize Keko” në zonën e Kinostudios, autor i të cilit ishte 19-vjeçari Jehon Breçani, djali i ish-drejtuesit të Policisë së Tiranës Erzen Breçani. I riu aksidentoi rëndë një grua 30-vjeçare, shtatzënë, e cila po ecte në trotuar në momentin e përplasjes dhe sipas dëshmitarëve të ngjarjes, i riu po ecte me shpejtësi “skëterrë” me Benz. Ndërkohë, pasioni për makinat kuptohet edhe nga postimet që 19-vjeçari ka bërë në rrjetet sociale. Në “story-n” e fundit që ka hedhur në Instagram, ai duket në timon me “Benz”-in luksoz AA 888 XX, pak orë para se të përplaste 30-vjeçaren.
Gjithashtu në profilin e tij në Instagram, ai shfaqet edhe me makina të tjera të tipit “Jeep” dhe “BMW”. Shkak i aksidentit të rëndë u bë humbja e kontrollit të mjetit prej shpejtësisë së lartë, ku fillimisht "Benz-i" doli nga rruga duke u përplasur me bordurat anësore dhe më pas mori përpara 30-vjeçaren, e cila ndodhet në spital dhe ka humbur njërën këmbë.