Krimineli i luftës, Ratko Mlladiç i cili u dënua ditën e sotme me burgim të përjetshëm, ka edhe një histori të vajzës së tij të vetëvrarë, për të cilën insistonte se ajo ishte vrarë nga kundërshtarët e tij politikë. Vajza e tij, Ana Mlladiç e cila ishte 23-vjeçare, më 25 mars të vitit 1994 u gjet e vdekur në shtëpinë e prindërve të saj në Beograd. Ajo raportohet se kishte qëlluar veten me një plumb në kokë me armën e babait të saj, pra të Ratkos.
Mlladiç refuzonte qe të pranonte se e bija e tij kishte bërë vetëvrasje, ndërsa këmbëngulte që ajo ishte vrarë nga kundërshtarët politikë të tij. Ndërkohë, raportohet se ai për shkak se kishte pushtet ka bërë që versioni i tij të imponohej si i vërtet për një kohë të gjatë. Ana u gjet e vdekur në shtrat, me një revole në dorë. Ishte pikërisht kjo revole, ajo që sqaronte qëllimin e Anës dhe atë që e kishte çuar vajzën e re t’i jepte fund jetës së saj.
Revolja ishte një 7.65 milimetërshe që Ratko Mlladiç e kishte marrë dhuratë nga Akademia Ushtarake e Komandës, kur ishte graduar major, kohë kjo kur ai shërbente si zëvendëskomandant i trupave ushtarake me bazë në Prishtinë. Vlen të theksohet se përfundimi zyrtar i hetimeve policore thotë se Ana Mladiç ishte vetëvrarë.