Nuk është hera e parë që pedagogët e universiteteve publike dhe jo vetëm ushtrojnë presion ndaj studentëve për të marrë shërbime private prej tyre. Jemi mësuar të dëgjojmë që pedagogët u kërkojnë studentëve të ndjekin kurse private që janë në pronësi të tyre për të marrë një notë më të mirë, apo edhe për të ndjekur trajnime ku vetë pedagogët janë udhëheqës. Një rast i ngjashëm ka mbërritur së fundmi në redaksinë e JOQ ALBANIA. Një student i një universiteti privat këtu në Tiranë ka treguar për atë se çfarë pedagogët i detyrojnë të bëjnë.
Qytetari ka treguar se është studenti i Universitetit privat "Marin Barleti" në degën e Edukimit Fizik dhe Sporteve dhe për këtë paguan 1500 euro tarifë vjetore. Por problemi nuk qendron te tarifa, por te fakti se tani u duhet të paguajnë një tarifë shtesë prej 1500 lekë të reja për një seminar online, kusht për të marrë kreditet e lëndës. Më tej ai ka treguar se faqja ku duhet të ndjekin seminarin online i përket pedagogut të tyre dhe ky justifikim për të marrë kreditet e lëndës po përdoret për përfitimet personale të tij. Ai shton se ky seminar është privat i pedagogut dhe jo shkollës, dhe nëse nuk marrin pjesë nuk mund të marrin kreditet e lëndës.
