E gjithë bota i ka sytë te lufta mes Izraelit dhe Palestinës e cila sa vjen e rritet e pasojat e saj janë shumë të rënda. Luftimet mes dy vendeve kanë nisur që para një jave edhe ende nuk kanë mbaruar, ku 198 njerëz kanë humbur jetën, përfshirë 58 fëmijë. Ndërsa sulmet me raketa dhe bomba shtohen çdo ditë, ajo që ka tërhequr vëmendjen e të gjithëve është "Kupola e Hekurt" e Izraelit e cila ka një normë përgjimi midis 85 dhe 90 përqind të raketave që drejtohen drejt zonave të populluara. "Kupola e Hekurt" përfshin një seri radarësh zbulimi dhe gjurmimi dhe kompania e cila e ka prodhuar pretendon se ka përgjuar më shumë se 2.500 kërcënime me një sukses më të madh se 90%.
Por duket se nga mënyra se si Izraeli po mbrohet me anë të "Kupolës së Hekurt" po mësojnë edhe vende të tjera të botës. Mediat greke kanë raportuar se edhe Greqia po merr në konsideratë ndërtimin e këtyre kupolave në ishujt e Egjeut. Pas tensioneve gjithnjë e në rritje me Turqinë dhe faktin se ushtria turke është e pajisur me një flotë të madhe me avionë pa pilotë që veprojnë në Egje dhe Mesdheun Juglindor, Greqia është vazhdimisht në kërkim të mënyrave alternative mbrojtjes ndaj tyre.
Greqia po merr në konsideratë krijimin e "Kupolave të Hekurta" të vogla pothuajse në çdo ishull të Egjeut. "'Kupola e Hekurt' mund të përdoret për të mbrojtur ishujt grekë nga sulmet me raketa ose zjarri artilerie që vijnë nga brigjet e kundërta të Azisë së Vogël, në rast të një konflikti greko-turk. Aftësitë e armës janë të tilla që sigurojnë që edhe raketat me rreze të shkurtër mund të përgjohen përpara se të arrijnë objektivin e tyre, duke mbrojtur kështu bazat ushtarake greke dhe civilët.
