Ditën e sotme është gjetur trupi i pajetë i një 32-vjeçari nga Shkodra i cili kishte humbur prej 3 ditësh. Endri Mustafa u gjet i vdekur në zonën e Livadhes, pasi e ëma kishte denoncuar në polici zhdukjen e tij. Mustafa është qëlluar me 7 plumba dhe nga këto 6 e kanë prekur në trup, ndërsa plumbin e shtatë e ka marrë në gojë. Mësohet se në morgun e spitalit nga mjeku ligjor, është konstatuar që viktima ka shenja dhune. Kjo ngre dyshimet se ai është dhunuar para se të vritej. Në vendngjarje është gjetur edhe një armë zjarri si edhe 8 gëzhoja.
Mustafa ishte një person me precedent të mëparshëm penal, i arrestuar në vitin 2020 për fajde, si dhe i dënuar për plagosje. Në vitin 2016 Mustafa u arrestua me 3 shtetas të tjerë si autorë të veprave penale “Vjedhje me armë”, “Plagosje e lehtë me dashje”, “Prodhim dhe mbajtje pa leje të armëve e municioneve luftrake” kryer në bashkëpunim, ndaj shtetasve me iniciale E.Gj dhe G.M. Dyshohet se kjo mund të jetë një larje hesapesh mes bandave kriminale që veprojnë në këtë zonë.
