Me protestë e pankarta në duar qytetarët kanë dal para MAShTI në lidhje me rastin në shkollën “Faik Konica”, ku një vajzë e mitur ishte ngacmuar seksualisht nga disa nxënës të po kësaj shkolle.
Ngjarja që ka tronditur të gjithë, është përshkruar përmes pankartave e thënieve “Mos e Normalizo Abuzimin seksual”, “Shkolla të sigurta për vajza”, “Çka ka shpija kallëzon fëmija”, “Poshtë sistemi që mundëson me abuzu”.
Aktivistët e të drejtave të njeriut, kanë kërkuar që kjo situatë të trajtohet me prioritet dhe që të gjendet një zgjidhje për këtë situatë, e që raste të tilla mos të përsëriten asnjëherë.
"Ne sot duam ta kthejmë vëmendjen te ministria dhe t’ua bëjmë edhe një herë me dije që këtij neglizhimi institucional duhet t’i vije fundi dhe që jeta e siguria e vajzave në shkolla është në rrezik dhe si të tillë duhet adresuar përmes politikave të mirëfillta e të drejta gjinore. Prandaj, kërkesat tona janë të qarta: 1. Futja e edukatës seksuale në shkolla; 2. Ambiente të sigurta për nxënëset/it; 3. Punësimi i punëtoreve/ëve sociale dhe psikologeve/ëve në të gjitha shkollat. Ne nuk do të ndalemi deri sa të realizohen këto tri kërkesa. Deri sa vajzat dhe gratë të jetojnë të lira noa çfarëdo lloj dhune dhe kontrolli, kudo që ato janë”, thanë mes tjerash protestuesit.
Përderisa Policia e Kosovës ka reaguar pas publikimit të një videoje në disa portale, sipas së cilës pretendohet se ka ndodhur një rast i abuzimit seksual në mes të nxënësve në oborrin e një shkolle në kryeqytet.
Në njoftimin e Policisë thuhet se nga zyrtarët e shkollës Policia ka pranuar një informacion me ndjeshmëri, i cili është trajtuar në koordinim me drejtuesit e shkollës, zyrtarët e Qendrës për punë dhe mirëqenie Sociale si dhe Prokurorin e shtetit.
