Data 17 Maj i vitit 2020 nuk do të harrohet lehtë. Kjo për shkak të ngjarjes tronditëse që ndodhi në Tiranë. Shëmbja e e Teatrit Kombëtar shënoi fitoren e betejës 20-vjeçare të kryeministrit Edi Rama me artistët, por edhe gjithë shqiptarët. Ishte ora 04:00 e mëngjesit të 17 Majit të vitit shkuar, kur fadromat nisën shembjen e godinës. Në ndihmë shkuan forca të shumta policie dhe ato të RENEA-s, të cilat nxorën jashtë aktorët dhe aktivistët e ngujuar brenda godinës. Jo të pakta kanë qenë tentativat e artistëve për të ndaluar shembjen e teatrit, që çuan edhe në tensione e përplasje të forta mes tyre dhe efektivëve të policisë.
Në kundërpërgjigje artistët që protestonin u shpërndanë nga policia, ndërsa disa prej tyre u shoqëruan në komisariat. Por përplasjet nuk i penguan aspak fadromat të vijonin me prishjen e teatrit edhe me zbardhjen e ditës. Pavarësisht rezistencës, uniformat blu formuan një kordon mbrojtje që kundërvepronte sa herë tentohej që të çahej nga protestuesit. Rezistenca e qytetarëve për mbrojtjen e teatrit vijoi edhe gjatë paradites. Në mesditë artistët që u shoqëruan gjatë natës iu bashkuan protestës, duke mos e fshehur dhimbjen për shëmbjen e godinës.
Vlen të thuhet se kjo shembje nuk u ideua më 17 Maj, por rezulton e ideuar që në vitin 2002 nga ish-kryebashkiaku i Tiranës së atëhershëm, Edi Rama, por që nuk u realizua dot për shkak të rezistencës së artistëve. Shembja u rikthye si temë diskutimi sërish në vitin 2018, atëherë kur Edi Rama ishte më i “fuqishëm”. Më pas ndërhyrja e politikës bëri që artistët të përçaheshin, ku u ndanë në dy palë pro dhe kundër shembjes përmes peticioneve, teksa Rama vijonte me përpikmëri planin e tij.
Plani ishte që teatri do të ndërtohej me Partneritet Publik Privat, gjë e cila hasi kundërshtinë e hapur të artistëve. Në funksion të realizimit të shembjes dhe ndërtimit me PPP të teatrit, Ministria e Kulturës e drejtuar nga ish-ministrja Mirela Kumbaro hartoi një ligj special, me qëllim shembjen dhe ndërtimin e teatrit nga kompania private “Fusha”. Një muaj para shembjes kompania “Fusha” u tërhoq nga gara dhe Bashkia e Tiranës premtoi se teatri do të ndërtohej me para publike.
Me një vendim qeverie teatri i kaloi Bashkisë dhe me një vendim të këshillit Bashkiak të mbajtur online në kushtet e pandemisë u vendos shembja e Teatrit Kombëtar, e cila u realizua në orët e vona të natës së 17 Majit 2020, duke finalizuar në këtë mënyrë përpjekjen 20-vjeçare të kryeministrit Rama.
