JOQ Albania
App Store
SHKARKO
Home
JOQ Albania

ARRSH i Ergys Verdhos shpall fituese për 2 miliardë lekë firmën që ofroi rreth 400 milionë më shumë
Shkruar nga: M Gjini | Publikuar më: 05/05/2021 21:48

  • Share
  • Share
  • Share
  • Share

Ergys Verdho siç e dini prej kohësh, është drejtori i Autoritetit Rrugor Shqiptar. Nëse shikoni historikun e lajmëve tona në lidhje me tenderat, do të vini re se emri i tij dhe i institucionit që ai drejton, janë përmendur në më të shumtën e rasteve. Kjo për vetë faktin se shifrat më të mëdha dhe tenderat më të dyshimtë janë dhënë pikërisht prej këtij institucioni. Me sa duket nëpër mjet ndërtimit apo rikonstruksionit të rrugëve, përfitimet e pjesëmarrësve janë shumë të mëdha.

E në këtë linjë duket se ky institucion vazhdon përsëri të organizojë tendera e të shpallë fitues në mënyrë të dyshimtë. Konkretisht bëhet fjalë për procedurën e prokurimit me numër REF-90285-03-17-2021 dhe me objekt “Përmirësimi i Sinjalistikës Horizontale në Akset dhe Segmentet Rrugore të Rajonit Verior”. Kjo procedurë ka si fond limit vlerën prej 166,666,422 lekësh të reja pa TVSH.

Duke hulumtuar në dokumentacionin e këtij tenderi shihen disa fakte të dyshimta. Së pari vihet re se kanë marrë pjesë në garë 6 kompani, përkatësisht “DELTAREX” me ofertë 164.652.486 lekë të reja pa tvsh; “ALMO KONSTRUKSION” me ofertë 130.004.066 lekë të reja pa tvsh; “ELDA – VL” me ofertë zero lekë; “JUBICA” me ofertë 159.967.240 lekë të reja pa tvsh; “RS&M & SI.SI.AL & GPG Company ” me ofertë 164.985.606 lekë të reja pa tvsh dhe “SMO Vataksi” me ofertë 163.939.332 lekë të reja pa tvsh.

Njëra prej kompanive ka ofruar vlerë zero çka përbën dyshim se ka marrë pjesë sa për numër. Ndërsa të paktën 4 kompani kanë ofruar vlera mjaft të përafërta me njëra-tjetrën, çka përbën një tjetër dyshim në lidhje me paracaktimin e fituesit. Ndërkaq fituese është shpallur firma “JUBICA” në pronësi të shtetasit Ndoc Kulla, me ofertë rreth 2 miliardë lekë të vjetra me tvsh. Mirëpo vihet re se një tjetër firmë ka ofruar gati 400 milionë lekë të vjetra me tvsh më pak se fituesi, e megjithatë për habi nuk është marrë në konsideratë. Pa përmendur këtu faktin se vlera fituese është thuajse e njëjtë me vlerën e fondit limit të tenderit, përkatësisht sa 95.9% e tij.