Fadil Dini, vëllai i dëshmorit, komandant Rrahman Dini, ka kërkuar nga Qeveria Kurti që të rregullohen varrezat e dëshmorëve në Velani të Prishtinës. Fadil Dini ia ka rikujtuar Kurtit deklaratën e tij, kur pati thënë se po bëhen dallavere me varret e dëshmorëve. “Dy llafe i kom. Ju kam pritë qe 16 vjet. Të vetmit që e kanë kry obligimin, po i citoj fjalët tuaja, janë dëshmorë, ne ia kemi borxh ton jetën. Do varre i kanë ndreqë, do s’i kanë ndreqë. Qeveritë e deritashme na kanë premtuar e na kanë rrejtë çdo ditë, po i citoj fjalët që i ke thënë, “ju edhe në tenderë të dëshmorëve vidhni, sepse jeni hajna klasik tipik”. Këtu gurët që i kanë ndreq dikush i ka ndreq dhe ka bërë hile unë po shoh këtu edhe bagëti që po kullosin, por ai fëmijë që e pinë tamlin e kësaj lope ka m’u hakmerr. Disa varre janë të gurit, disa janë kështu qysh janë”, ka thënë Dini. Kryeministri Albin Kurti, presidentja Vjosa Osmani dhe Kryeparlamentari Glauk Konjufca kanë bërë homazhe te varrezat e dëshmorëve në Velani. Kujtojmë se, ditët e 17,18,19, 20 dhe 21 prillit të vitit 1999, për shumë familje dhe qytetarë të trevave të Llapit e Gollakut që kishin marrë rrugën e shpëtimit përmes fshatrave Koliq, Grashticë, Makoc e Llukar, për shumëkënd u shndërruan në ditë tmerri e krimi të paparë.