Një nga problemet më të ndjeshme në vendin tonë është pikërisht ikja e të rinjve jashtë shtetit për shkak të papunësisë dhe nivelit të lartë të korrupsionit. Në një anketë të kryer së fundmi nga Rrjeti i të Rinjve, mbi 70% e të rinjve shprehen se papunësia është problemi i tyre më i madh. Problemi i dytë lidhet me arsimin jo cilësor dhe mungesa e mbështetjes nga ana e institucioneve. Rezultatet e Anketës Kombëtare nga Rrjeti i të Rinjve u publikuan në një forum mbi demokracinë shqiptare, ku morën pjesë studiues, veprimtarë dhe ekspertë të çështjeve sociale, raporton VOA. Mbi 80% e të rinjve deklarojnë se qeveria nuk ka bërë asgjë për të ulur shkallën e papunësisë së tyre, ndërsa 70% shprehen se mungojnë programet mbështetëse dhe se nuk ka një analizë të mirëfilltë për kushtet e tregut të punës.
Nisur nga kjo, mbi 90% e tyre shprehen se e kanë menduar seriozisht largimin nga Shqipëria për të siguruar një shkollim, puënsim dhe jetë normale. Ndërkohë 65% e të rinjve deklarojnë se ata lihen jashtë proceseve vendimmarrëse dhe se zëri i tyre dëgjohet vetëm formalisht nga partitë politike gjatë fushatave elektorale. Problem tjetër është dhe rritja e kriminalitetit tek të rinjtë. Por megjithë këto problematika, teksa ka mbetur thuajse një javë, pjesa më e madhe e të rinjve pohon se do të marrin pjesë në zgjedhjet e 25 prillit si një rrugë për jetesë më të mirë në atdheun e tyre.
