Edhe pse jemi në një situatë të rënduar epidemiologjike nga frika e përhapjes së koronavirusit, qytetarët beratas nuk kanë harruar ritet e Ditës së Verës dhe traditat qindra vjeçare për të pritur pranverën. Mbrëmjen e sotme, beratasit kanë ndriçuar oborret e banesave, bahçet e rrugët e qytetit, duke ndezur zjarre të shumta për të festuar këtë ditë të veçantë. Dita e Verës është një festë pagane e trashëguar ndër breza së bashku me ritualet e saj specifike që edhe sot vijojnë të respektohen nga qytetarët e Beratit edhe pse të përshtatura me kohët që jetojmë.
Kjo traditë ka shekuj që kryhet në Berat me ndezjen e zjarrjeve në vigjilje të Ditës së Verës, për të mirëpritur një verë të mbarë. Edhe pse beratasit nuk do të mund ta festojnë këtë vit Ditën e Verës si çdo vit tjetër me festime e grumbullime masive në sheshe e restorante, kanë vendosur të paktën të kryejnë ritualin e zjarreve.