Ditën e djeshme u njoftua se GJKKO ka vendosur të lirojë mjekun kardiolog në QSUT Edvin Prifti, i cili u arrestua disa ditë më parë pasi iu gjetën rreth 500 milionë lekë në banesë dhe në zyrë. Ndaj tij është lënë në fuqi masa "Pezullim detyre" dhe u vendos masa e sigurisë nga “arrest me burg” në “arrest shtëpie”. Seanca e djeshme, ishte mjaft “sekrete”, por "Panorama.al" ka mësuar dhe arsyen se përse Gjykata e dha një vendim të tillë. Burimet nga brenda seancës thanë se kërkesa e mjekut Prifti ka qenë bindëse për trupën e Gjykatës. Kjo e fundit, mësohet të jetë bindur mbi faktin që mjeku nuk paraqet rrezikshmëri për largim nga vendi apo që të ndikojë në zhvillimin e hetimeve ndaj tij. Po ashtu, mësohet se një tjetër arsye që e ka bindur Gjykatën, dyshohet të jetë edhe arsimi i kardiokirurgut.
KËRKESA E MBROJTJES NË GJYKATË
Që në çastin e përpilimit të procesverbalit të kontrollit të banesës, i pandehuri dhe mbrojtja pretenduan dhe pasqyruan në procesverbal faktin se të hollat e sekuestruara ishin të ligjshme, i përkisnin bashkëshortes së të hetuarit znj. Enida Prifti dhe buronin nga një marrëdhënie juridike për shitjen e pjesës ideale (1/9 pjesë e pasurisë së pandarë), që ajo trashëgon nga babai dhe që është pasuria me nr.1847, e llojit truall me sipërfaqe 2000 m2, nga e cila 435 m2 është ndërtesë, fakt që vërtetohet nga certifikata e vërtetimit të pronësisë. Kjo pronë ndodhet në Priskë të Madhe (Dajt) dhe njihet me emrin “Kompleksi Triada” (bar, restorant, hotel).
Për të vërtetuar këtë fakt, të pretenduar qysh në çastin e kontrollit, paraqitën një akt-marrëveshje, të datës 23.12.2020, të lidhur mes shtetasve Enida Prifti, nga njëra anë shitësja dhe Alba Hoxha e Kreshnik Sinani (blerësit), ku e para bën premtimin për kalimin e pronësisë të pjesës së saj takuese kundrejt shumës 350 mijë euro, pasi blerësit të kishin zgjidhur problemin e pëlqimit të bashkëpronarëve të tjerë. Paratë janë dhënë në dorë, jashtë kanaleve bankare, sepse ky ishte vullneti i palës blerëse”, shprehej mjeku në kërkesën e depozituar në Gjykatë.
