Pirro Vengu është aktualisht drejtori i Autoritetit Portual Durrës. Si i tillë, zotëria në fjalë organizon tendera të ndryshëm e të shumtë duke “larë” me para të bekuarit të cilëve u ka dalë emri për t’u “gostitur” me tendera. E me sa duket, “i bekuari” i rradhës, është edhe Genci Likoskendaj, pronar mazhoritar i disa kompanive, ndër të tjera edhe të kompanisë TETRA SOLUTIONS.
Bëhet fjalë për një tender me numër reference REF-81526-12-09-2020 dhe me objekt “Blerje pajisje në kuader të zgjerimit të sistemeve ISPS” (barriera tornelo, bollarde, etj). Këtu vihen re dy aspekte të dyshimta. Së pari në garë ka marrë pjesë vetëm një kompani, pra TETRA SOLUTIONS, e cila natyrisht duke qenë e vetme në garë, ka fituar.
Së dyti, vlera e ofruar është 8,270,000 lekë të reja pa TVSH ose rreth 100 milionë lekë të vjetra me TVSH. Mirëpo kjo vlerë rezulton thuajse identike me vlerën e fondit limit të tenderit, ose më saktësisht është sa 94.29% e tij. Të dyja këto aspekte, në praktikat ndërkombëtare të tenderimit, njihen si ngjarje të dyshimta që sinjalizojnë për fitues të paracaktuar.
